2024 оны 6 дугаар сард Хан-Уул, Сүхбаатар дүүргийн нутаг дэвсгэрт 20 настай эрэгтэй Ц.Дагвадорж 10 гаруйхан хоногийн зайтай 16 болон 32 настай хоёр эмэгтэйг хөнөөгөөд, хэргээ нуун далдлахын тулд цогцсыг нь чемодан, хувцасны шүүгээнд нуусан гэмт хэрэг гарсан. Энэ хэргийн тухай мэдээлэл сүүлийн өдрүүдэд олон нийтийг цочирдуулаад байна.

Энэ талаар нийслэлийн Прокурорын газраас тодрууллаа. НПГ-аас “Цагдаагийн байгууллага 2024 оны 6 дугаар сарын 21-ний өглөөний 5 цаг орчимд иргэн Э.Г-ээс гэмт хэргийн талаарх мэдээллийг хүлээн авсан. Холбогдох албаныхан хэргийн газарт үзлэг хийх явцад 16 настай, эмэгтэй Ч.Ш-ийн амь насыг хохироосон, цогцсыг нь чемоданд хийсэн болон бусад нөхцөл байдал илэрч, мөрдөн шалгах ажиллагаа явуулж эхэлсэн.

Мөрдөн шалгах ажиллагааны явцад Ц.Д нь насанд хүрээгүй Ч.Ш-ийн хоолойг цахилгааны утсаар боож, амь насыг нь хохироон, чемоданд хийсэн, иргэн Т.З-гийн хоолойг цахилгааны утсаар боож, амь насыг нь хохироон, ханын шүүгээнд нуусан нь илэрсэн.

Ц.Д нь насанд хүрээгүй Ч.Ш-ийн амь насыг хохироосны дараа нь Э.Н, Э.Г нарыг заналхийлэн, хохирогч Ч.Ш-ийн цогцсыг чемоданд хийлгэж, дуу, дүрсний бичлэг хийж сүрдүүлсэн. Мөн Т.З-ын амь насыг хохироосны дараа эд зүйлийг нь устгаж гэмтээсэн, Т.З-гийн фэйсбүүк хаягаар нь бусадтай харилцаж, мөнгө шилжүүлэн авсан байдаг.

Эдгээр хэргийг мөрдөн шалгах явцад Ц.Д нь 16 насанд хүрээгүй Т.М гэдэг хүнтэй бэлгийн харьцаанд орсон, Х.Э нь тэрхүү насанд хүрээгүй хохирогчийг зуучилсан зэрэг гэмт үйлдэл мөрдөн шалгах ажиллагааны үед тогтоогдсон.

Мөрдөх байгууллага Ц.Д-г хоёр хүн алсан, бусдын эд хөрөнгийг устгах, гэмтээх, хулгайлах, залилах, заналхийлэх, 16 насанд хүрээгүй хүнтэй бэлгийн харьцаанд орох гэмт хэрэгт, Х.Э-г бусдыг 16 насанд хүрээгүй хүнтэй бэлгийн харьцаанд орох гэмт хэрэг үйлдэхэд нь дэмжлэг үзүүлсэн гэмт хэрэгт яллагдагчаар татах санал гаргаж, ирүүлснийг нийслэлийн Прокурорын газар эрүүгийн хэрэг үүсгэж, яллагдагчаар татсан.

Нийслэлийн Прокурорын газар уг хэрэгт 2024 оны 11 дүгээр сарын 21-ний өдөр яллах дүгнэлт үйлдэж, шүүхэд шилжүүлсэн. 2025 оны 01 дүгээр сарын 13-ны өдөр шүүх хэлэлцээд, прокурорт хэргийг буцаасан. Прокурор шүүхийн шийдвэрийг эс зөвшөөрч, 2025 оны 02 дугаар сарын 03-ны өдөр эсэргүүцэл бичсэнийг давж заалдах шатны шүүх 2025 оны 3 дугаар сарын 25-ны өдөр хянан хэлэлцээд, шүүгчийн захирамжийг хэвээр үлдээсэн.

Шүүхээс уг хэргийг 2025 оны 5 дугаар сарын 01-ний өдөр прокурорт буцаан ирүүлсэн байдаг. Мөрдөх байгууллагаас шүүгчийн захирамжийн дагуу шинжилгээ хийлгэн, дүгнэлт тодорхойлолт гаргуулах, нэмж мэдүүлэг авах зэрэг ажиллагааг гүйцэтгэж, хэргийг шүүхэд шилжүүлэхээр прокурорт ирүүлсэн. Прокуророос яллагдагч Ц.Д, Х.Э нарын үйлдсэн хэрэг тогтоогдсон гэж дүгнэн, 2025 оны 8 дугаар сарын 14-ний өдөр яллах дүгнэлт үйлдэж, шүүхэд шилжүүлжээ.

Прокурор нь мөрдөн байцаалтын ажиллагаа дууссан хэргийг хянаад, цугларсан нотлох баримтыг тал бүрээс нь хянаж, өөрийн дотоод итгэлээр нотлох баримтыг үнэлж, хэргийг шүүхэд шилжүүлэх шийдвэрийг хараат бусаар гаргадаг.

Шүүхийн урьдчилсан хэлэлцүүлгийг 2025 оны 9 дүгээр сарын 17-ны өдрийн 16 цагт явуулахаар товложээ. Шүүхийн урьдчилсан хэлэлцүүлэг нь яллагдагч нарын гэм буруу, эрүүгийн хариуцлага хүлээлгэх эсэх асуудлыг хэлэлцдэггүй. Хэргийг прокурорт буцаах, яллагдагчийг шүүхэд шилжүүлэх шийдвэрийн аль нэгийг гаргадаг” гэв.