Ази, Номхон далайн бүс нутгийн өргөн нэвтрүүлгийн холбооны /ABU/ Ерөнхий чуулган есдүгээр сарын 11-15-ны өдрүүдэд Улаанбаатар хотноо амжилттай болж өндөрлөлөө.

Энэ удаагийн чуулганд Японы NHK, Хятадын CGNT, Солонгосын KBS, Австрали, Италийн телевиз, Туркийн TRT гэх мэт 43 улсын 250 гаруй хэвлэл мэдээллийн тэргүүлэх байгууллагуудын захирал, продюсер, уран бүтээлчид оролцож, телевиз, хэвлэл мэдээллийн хөгжлийн чиг хандлага, тулгамдсан асуудлуудыг хэлэлцсэн юм.

Өнөөдөр радио телевизийн өргөн нэвтрүүлгүүдийн удирдах зөвлөл, захирлууд тулгамдсан асуудал бэрхшээл, соёлын өв, сошиал орчин, мэргэжлийн чиг хандлага гэх зэрэг хэд хэдэн сэдвийн хүрээнд хэлэлцүүлэг өрнүүллээ.

Ази, Номхон далайн бүсийн орнуудын өргөн нэвтрүүлгийн холбооны Удирдах зөвлөлийн (ABU Administrative Council) гишүүнээр МҮОНРТ сонгогдлоо.

Мөн хурлын төгсгөлд ABU тугийг Шри-Ланка улсын төлөөлөгчдөд гардууллаа.

"ABU GENERAL ASSEMBLY" олон улсын хурлыг МҮОНРТ эх орондоо хоёр дахь удаагаа ийнхүү амжилттай зохион байгууллаа.

Энэ удаад чуулганыг “Үндэсний өв соёлоо хамгаалж, түгээн дэлгэрүүлэхэд телевиз, радио, хэвлэл мэдээллийн байгууллагын үүрэг, оролцоо” сэдвийн дор зохион байгуулсан нь онцлог байсныг зочид, төлөөлөгчид онцолж байв.

Хурлын үер “ABU ДУУНЫ НААДАМ” зохион байгуулж, 10 улсын уран бүтээлчид оролцож, өөрсдийнхөө орны дуу, уран бүтээлээс хүргэсэн.

“ABU ДУУНЫ НААДАМ”-д Монгол Улсаа төлөөлөн “The Hu” хамтлаг оролцсон юм.

Одоогийн байдлаар ABU нь дөрвөн тивийн 76 оронд 272 гишүүнтэй. ABU нь өдөр тутмын мэдээ солилцох, хамтарсан бүтээлүүд, нэвтрүүлгийн солилцоо, техникийн, хууль эрх зүйн, менежментийн зөвлөхүүд, түүнчлэн салбарын болон олон улсын хурал, зэрэг өргөн хүрээний үйлчилгээ эрхэлдэг. Мөн спортын томоохон арга хэмжээнүүдийн эрхийн талаар хэлэлцээ хийж, бүс нутагтаа хамруулах ажлыг зохион байгуулдаг томоохон байгууллага юм.