Ажил дээр удирдлагын албан тушаалтнуудаа хэл амаар доромжилж, хараах нь ажлаас чөлөөлөх шалтгаан мэт санагдаж магадгүй. Тэгвэл Их Британид Керри Херберт нэртэй эмэгтэй даргаа “новш” дуудсаныхаа төлөө ажлаасаа халагдсан ч шүүх түүнийг үндэслэлгүйгээр ажлаас чөлөөлсөн гэж үзжээ.

“Daily Mail” агентлаг мэдээлснээр шүүгч Соня Бойес “Түүний хэлсэн үг зохисгүй, харамсалтай байсан нь үнэн ч гэлээ, шууд халуулах хэмжээнд хүрээгүй” хэмээн түүнийг ямар нэгэн үндэслэлгүйгээр ажлаас нь халсан гэх шийдвэр гаргасан байна.

2018 оноос хойш Херберт барилга угсралтын “Main Group Services” компанид хадам ах Томас болон хадам эгч Анна Суоннелл нарын хамт ажиллажээ. Тэр тус компанийн үйл ажиллагаа хариуцсан менежер, гүйцэтгэх менежерээр ажилладаг байсан гэж personneltoday.com сайт мэдээлжээ.

Херберт өдөр тутмын үйл ажиллагааг удирдах, цалингийн тооцоог хянах, хурал зохион байгуулах, мөн админ ажилтнуудын оронд ажиллах зэрэг ажлыг жилийн 50 мянга гаруй ам.долларын цалинтай хийдэг байсан юм.

Харин 2022 оны тавдугаар сард тэрбээр ажлынхаа шүүгээг ухаж байхдаа өөрийн цалин, ажлын зардалтай холбоотой баримт олжээ. Тэрхүү материал ихээхэн цочирдмоор байсан гэж Херберт шүүхэд мэдүүлсэн юм. Материалыг харсныхаа дараа Херберт өөрийг нь халах гэж байна гэж боджээ.

Уг явдлаас нэг их удалгүй дарга Томас Суоннелл нь түүнийг дуудаж ажлын гүйцэтгэлийг шүүмжилжээ. Соунелл “Чи манай оффисыг зөв удирдаж чадахгүй байна, ханган нийлүүлэгчдэд төлбөрөө цаг тухайд нь өгөөгүй тохиолдлууд гарсан, захиалга дээр асуудал гарч байна” гэж хэлсэн байна.

Үүний хариуд Херберт “Өөр хэн нэгэн ийм нөхцөлд ажиллаж байсан бол аль хэдийн хэдэн жилийн өмнө ажлаа өгсөн байгаа. Харин би та хоёр гэж новшийн төлөө үлдсэн” гэж тэр хэлжээ.

Тэрбээр дараа нь шүүхэд мэдүүлэхдээ “новш” гэж хэлсэн нь үнэндээ тоглоом байсан гэж тайлбарлаж, өөрийг нь үндэслэлгүй халсан хэмээн тус компанийн эсрэг зарга үүсгэсэн байна.

Компанийн зүгээс түүнийг “ажлын гүйцэтгэл муу байсан учраас” халсан гэх мэдэгдэл гаргасан юм. Гэвч Шүүгч Бойес “Шууд ажлаас нь чөлөөлөх хангалттай шалтгаан үүссэн гэж үзсэн нь үндэслэлгүй” хэмээн шийдвэрлэсэн байна.

Шүүх “Main Group Services” компанийг Хербертэд 20 мянган ам.доллароос дээш нөхөн төлбөр төлж, түүний шүүхийн зардалд 19 мянган ам.доллар төлөхийг тушаажээ.

Эх сурвалж: New York Post