ХХААХҮЯ-ыг Дарханаас Улаанбаатар руу нүүлгэнэ, нүүлгэхгүй гэдэг хэрүүлээс чухал асуудал бий аж. Тодруулбал, яамаа нүүлгэхдээ баахан ажилтандаа байрны урьдчилгаа гээд тараачихсан бэлэн мөнгөний асуудал гарч ирлээ.

ХХААХҮ-ийн өмнөх сайд Ж.Энхбаяр "Хөдөө аж ахуйн бирж" ТӨХХК-ийн хуримтлагдсан ашгаас 52 хүнд ₮3.1 тэрбумыг орон сууцны урьдчилгаа хэмээн өгсөн байна. Яамны 45 ажилтан, жижиг дунд үйлдвэрийн долоон ажилтан үүнд хамрагджээ. Нэг ажилтанд 60 орчим сая төгрөг ногдсон гэсэн үг. Ж.Энхбаярт энэ мөнгийг гаргаж өгсөн хүмүүс нь "Хөдөө аж ахуйн бирж" ТӨХХК-ийн Гүйцэтгэх захирал Х.Отгонбаяр, нягтлан Б.Номин-Эрдэнэ нар болж таарч буй.

Тэдний энэхүү зөрчил бүр аудитын шалгалтын хүрээнд илэрч. Улмаар аудитын байгууллагаас зөрчлөө арилгах тухай албан шаардлага хүргүүлсэн байна. Зөрчлийг 2025.09.01-ний дотор арилгах үүрэг авчээ. Гэвч гурван сар өнгөрсөн ч, одоо хүртэл тоохгүй байгаа бололтой.

Энэ тухай УИХ-ын гишүүн З.Мэндсайхан хөндсөн ч тодорхой хариулт олдсонгүй.

Яам нүүлгэж тоглохдоо төрийн өмчит компанийн ашгаас зарцуулан шамшигдуулсан Ж.Энхбаярыг шалгах учиртай. Гэтэл шалгах нь бүү хэл Тэргүүн Шадар сайд бөгөөд Эдийн засаг, хөгжлийн сайдаар залчихсан байдаг. Ерөнхийлөгчийн “сайн дүү”, Ерөнхий сайдын “танхимын сайд” гэдгээрээ хамгаалагдсаар суух уу.

Саяхан ЗГХЭГ-ын дарга С.Бямбацогт төрийн өмчит компаниудад хийсэн шалгалтын хариугаа танилцуулж, баахан төрийн өмчит компанийн дарга нарыг хоморголон сольсон. Үүнд, жишээлбэл Ж.Энхбаяр сайдын энэхүү кейс ил болоогүй. Нууцгаасан ч биз.

Нөгөө талаар дуртай сайд нь гарч ирээд ТӨХК-иудыг муулдаг. Алдагдалтай ажиллаж байгааг нь гайхацгаадаг. Тэгэнгээ тонодог байж болохгүй баймаар.

Eguur.mn