Өнгөрсөн долоо хоногт УИХ-ын дарга Н.Учрал Дорнод аймгийн иргэдтэй уулзах үеэр иргэн төрийн өндөр албан тушаалтан, төрийн албаныхны авлига албан тушаалын хэрэгт ямар хариуцлага оногдуулах вэ, яагаад чимээгүй болчихов гэдгийг Б.Энхбаяр сайдаас асуужээ.

Иргэний асуултад ХЗДХ-ийн сайд Б.Энхбаяр хариулахдаа " Авлиагачид, хулгайчдын асуудал шийдэгдэх болов уу гэж асууж байна. Энэ шийдэгдэнэ. Хуулийн цээрлэлээ үзнэ. Хэн байхаас үл хамаарч шийтгэлээ хүлээнэ. Хуулийн дагуу нотлох процесс явагдаж байгаа. Хууль шүүхийн байгууллага ажиллаж байгаа, би гэм буруутай нь нотлогдоно гэж бодож байгаа. Харин УИХ-ын гишүүний бүрэн эрхийн цаана зарим хүн энэ хуулийн цээрлэл, хариуцлагаас зугтчих, бултчих санаархлаар гишүүний бүрэн эрхтэйгээ байх гэсэн арга, залийг хүчтэй хийж байна. Зарим нүүрсний хулгайч далайн эрэг дээр бүтэн сар, сүүлийн нэг сар амарлаа. Одоо Монголдоо ирэх хэрэгтэй. Өмнө нь хүн гүтгэлээ, худлаа ярилаа гэж намайг хэлж байсан. Тэгвэл юугаа хийгээд далайн эрэг дээр зугтаад Монголдоо ирж шалгуулахгүй байгаа байгаа юм. Хэрэв хуулийн хариуцлагаас зугтаад байгаа бол УИХ-ын гишүүнийх нь бүрэн эрхийг түдгэлзүүлж байгаад шалгая гэдэг асуудлыг би намрын чуулган хаахаас өмнө ч хэлж байсан. Тэгэхгүй бол шалгуулахгүй юм байна. Тиймээс УИХ-ын Хаврын чуулган эхлэхэд би энэ асуудлыг Хууль зүйн сайдын хувьд хариуцлагатай ярина. Халуухан хавар болох байх гэж бодож байна" гэжээ.