2024 оны 8-р сард УИХ-ын гишүүн асан Д.Тогтохсүрэнг "Монголросцветмет" ТӨҮГ-ын захирлаар томилсон. Өөрөөр хэлбэл Ерөнхий сайд асан Л.Оюун-Эрдэнийн үед энэ суудал дээр очсон хүн.

УИХ дахь МАН-ын бүлгийн даргаар ажиллаж байсан тэрбээр 2024 оны сонгуульд Хангайн бүсэд нэр дэвшээд ялагдсаныхаа дараа хайлуур жонш, үнэт металл болон бусад төрлийн ашигт малтмал баяжуулах, экспортыг нэмэгдүүлэх улсын хамгийн том, гадны хөрөнгө оруулалттай төрийн өмчит үйлдвэрийн газар одоогийн "Эрдэнэс критикал минералс"-т даргаар очиж суусан.

Д.Тогтохсүрэн анх удаа авлигын хэргээр шалгагдаж байгаа юм биш. 2019 онд түүнийг АТГ-аас мөн л авлигын хэрэгт холбогдуулан шалгаж байсан юм. 2016 онд тэрбээр Өвөрхангай аймгийн Засаг даргаар ажиллаж байхдаа тендерт шалгаруулж өгснийхөө төлөө 70 сая төгрөгийн авлига авсан гэх асуудлыг иргэн гомдол гаргаж, АТГ-т хандсан гэх бөгөөд энэ асуудлыг өөрөө үгүйсгэсээр ирсэн юм. Мөн хуулийнхан энэ асуудалд шалгаж чадсан ч яллаж чадаагүй.

Үүнээс гадна түүнийг дагасан, тойргийнхоо иргэдэд бэлэн мөнгө тараасан гэх асуудал ч мөн нэг үе сөхөгдөөд өнгөрч байсан билээ. МАН-ын бүлгийн дарга хийж байсныхаа "шагнал"-д одоогийн албан тушаалаа авсан гэж яригддаг Д.Тогтохсүрэнгийн хувьд намынхаа хууччуулын нэг, ерөнхийлөгчийн хүн ч гэж мэдээлэгддэг билээ.

Хамгийн сүүлд буюу 2024 онд АТГ-т мэдүүлсэн ХОМ-ийг нь харахад,

• Өөрийн орлого: 160 сая
• Гэр бүлийн орлого: 38 сая
• Нийтийн орон сууц нэг: 800 сая
• Адуу-4, Үхэр-5, Хонь-30, Ямаа-25: 15 сая
• Үнэт эдлэл: 10 сая
• Хадгаламж: 6.8 сая
• Зээл: 150 сая төгрөг байгаа юм.

АТГ-ын шалгалт хэрхэн үргэлжилж, Д.Тогтохсүрэнд холбогдсон асуудал хэрхэн хөврөхийг бид эргэн мэдээлэх болно.