УИХ-ын гишүүн Л.Мөнхбаатар, Ц.Даваасүрэн нар Хөвсгөл аймагт ажиллаж байна. Тэрээр Хөвсгөл аймгийн удирдлагуудтай уулзаж, аймаг орон нутагт хэрэгжиж буй хөрөнгө оруулалт, бүтээн байгуулалтын ажлуудын явц, цаашдын хамтын ажиллагааны талаар санал солилцлоо.

Уулзалтын үеэр аймгийн хэмжээнд хэрэгжүүлж буй төсөл, хөтөлбөрүүдийн үр дүн, иргэдийн амьжиргааг дэмжих чиглэлээр авч хэрэгжүүлж буй арга хэмжээний талаар хэлэлцсэн юм. Тухайлбал, Хөвсгөл аймгийн Засаг даргын санаачилгаар “Бүтээлч Хөвсгөлчүүд” аяны хүрээнд “Өрхийн үйлдвэрлэлийг дэмжье – Амьдрах орчноо сайжруулъя” арга хэмжээг өнөөдөр зохион байгуулж байна.

Тус арга хэмжээний хүрээнд орон нутгийн төсвийн хөрөнгө оруулалтаар бүтээн байгуулалт, тохижилтын ажлуудыг үе шаттайгаар хэрэгжүүлж байгаа бөгөөд өрхийн үйлдвэрлэл эрхлэгчдийг дэмжих зорилгоор шаардлагатай тоног төхөөрөмжийг гардуулан өгөхөөр ажиллаж буй талаар мэдээлэл өглөө. Энэхүү ажлын хүрээнд жижиг, дунд үйлдвэрлэл эрхлэгчдийн үйл ажиллагааг дэмжиж, иргэдийн орлогыг нэмэгдүүлэх, амьдрах орчныг сайжруулахад бодит хувь нэмэр оруулахаар төлөвлөж буйг онцолж байна.

Мөн уулзалтын үеэр Хөвсгөл нуурын тахилгын үйл ажиллагааг зохион байгуулах ажлын хэсэг бэлтгэл ажлынхаа талаар мэдээлэл өглөө. Тахилгын арга хэмжээг уламжлал, ёс заншлыг хадгалсан өргөн хүрээнд зохион байгуулалахаар төлөвлөж буйг онцолж, холбогдох байгууллагуудын хамтын ажиллагааг ханган ажиллаж байгаа талаар танилцууллаа гэв.