Өнөөдөр нийслэлд үхрийн махны үнэ 30 мянган төгрөгийн босго давж, 31-35 мянган төгрөгт хүрсэн нь улаанбаатарчуудын асуудал боллоо. Орлого багатай иргэдийн хувьд улаан даавуу зулгаах шахам байна.

Энэ тухайд төрөөс ямар нэгэн арга хэмжээ авах эсэх талаар УИХ-ын гишүүдээс асуухад янз бүрийн байр суурь илэрхийлж байгаа. УИХ-ын гишүүдийн олонхи нь орлого буурай иргэдийн хувьд махны үнэд төр оролцохгүй бол яагаад ч болохгүй гэдгийг УИХ-ын чуулганы хуралдаан болон бусад үед ч байр сууриа илэрхийлэх аж. Харин Шадар сайд Т.Доржханд “Тахиа гахайныхаа махыг идээд амьдар” гэж зөвлөсөн. Махны үнэд үнэхээр төр оролцох уу, үгүй юу гэдэг нь асуудал.

Зах зээлийн зарчмаараа цааш явах уу, эсвэл төр оролцож, зүдэрсэн иргэдийнхээ нурууг түр ч атугай амасхийлгэх үү гэдэг зүйл тулгарсан. Үнэн хэрэгтээ амьдралд хүрэлцэхээр цалин хангамж авдаг бол төр оролцохын хэрэг юун. Гэтэл манайд хүртээмжтэй цалин тэтгэвэр гэж байхгүй, угаасаа ч байсангүй. Тэгэхээр яах аргагүй төр оролцохгүй бол иргэд олон нийт туйлдана.

Гагцхүү махны үнэ өсөж байгаад баяртай байгаа ганцхан хүн бол Эдийн засаг хөгжлийн сайд фермер Ж.Энхбаяр. Тэрбээр өөрөө ч “Махны үнэд төрөөс оролцох шаардлага байхгүй. Зах зээлийнхээ зарчмаар явах хэрэгтэй” хэмээн УИХ-ын чуулганы хуралдаан дээр нэн баяртайгаар хэлнэ лээ. Фермер сайд маань өөрөө үхрийн фермийн аж ахуйтай, махны бизнес хийдэг хүн учраас баярлахаас яахав.

Tumen.mn