Москвагийн ахлах сургуулийн төгсөгчид сургалтын төлбөргүй их, дээд сургуулиудад орохын төлөө ширүүн өрсөлдөх болжээ. Төлбөртэй сургуулиудын элсэлтийн квотыг бууруулж, эсрэгээрээ цэргийн квотыг нэмэгдүүлж байгаатай энэ нь холбоотой. Өөрөөр хэлбэл, цэргийн алба хаасан хүмүүст зориулсан элсэлтийн квот нэмэгдсэн аж.

Тасс агентлагийн мэдээлж буйгаар, Москвагийн улсын их сургууль, Эдийн засгийн дээд сургууль, Оросын Хүмүүнлэгийн их сургууль зэрэг томоохон сургуулиудад төсвийн квот буюу сургалтын төлбөргүй элсэлтийн орон тооны төлөөх өрсөлдөөн ихээхэн өсчээ. Ойролцоогоор хоёр оронтой хувиар энэ үзүүлэлт өссөн аж. Тухайлбал, Плехановын нэрэмжит Оросын Эдийн засгийн их сургуулийн Олон улсын харилцааны хөтөлбөрт нэг орон тоонд ногдох өргөдлийн тоо 257 хүрчээ. Харин Москвагийн улсын их сургуульд нийт өргөдлийн тоо 46 хувиар өсч, 91 мянга давсан байна.

Дээр дурдсанчлан энэхүү өсөлт нь Оросын их сургуулиуд Украинд байлдсан цэргүүд болон тэдний хүүхдүүдэд зориулан төлбөргүй элсэлтийн квотынхоо дор хаяж 10 хувийг хадгалахаар болсонтой холбоотой. Мөн их, дээд сургуулиудын сургалтын төлбөрийн өсөлт ч нөлөөлж буй.

Украин дахь дайн эхэлснээс хойш Оросын их сургуулиудад цэргийн квотоор элссэн оюутны тоо бараг хоёр дахин нэмэгдсэн. Энэ үзүүлэлт 2026 онд түүхэн дээд хэмжээндээ хүрч, 41 мянга болжээ.

ЭХ СУРВАЛЖ: MOSCOW TIMES