Өнгөрсөн оны аравдугаар сард Д.Энхтөр гэгч нь Архангай аймгийн Цахир сумын Содномдаржаа уулын бэлд оршуулсан Цорж аграмба Санжжав гэх хүний булшийг сүйтгэсэн. 

Улмаар занданшуулсан шарилыг авч Сонгинохайрхан дүүргийн есдүгээр хорооны нутаг Баруун баян уулын 18-06 тоотод нууж байгаад өнгөрсөн нэгдүгээр сарын 27-ны өдөр бусдад зарах гэж байгаад баригдсан билээ.
 
Уг үйлдэлд нь Сонгинохайрхан дүүргийн Цагдаагийн хоёрдугаар хэлтсээс Монгол Улсын эрүүгийн хуулийн тусгай ангийн 129 дүгээр зүйлийн 129.1 дэх хэсэг /булш сүйтгэх/ зааснаар эрүүгийн хэрэг үүсгэн мөрдөн байцаалтын ажиллагаа явуулсан байна. 

Энэхүү хэрэгт Дүүргийн хоёрдугаар прокурорын газраас хяналт тавьж, яллах дүгнэлт үйлдэж Дүүргийн Эрүүгийн хэргийн анхан шатны хоёрдугаар шүүхэд хэргийг шилжүүлсэн байна. Тэгвэл түүнд холбогдох шүүх хурлыг өнөөдөр хэлэлцэж шийдвэрээ гаргажээ. Шүүхээс түүнд зургаан сарын баривчлах ял оноожээ.