-Зэс хайлуулах  үйлдвэр барих төсөл яагаад унав-

Худгийн ховоогоор нүдээд байхад нүдээ аниад онгоцтой ус руу дайраад байдаг цангасан үхэр байдаг даа. Түүнтэй адилхан  албан тушаал, эрх мэдэл, сандал ширээ рүү цангасан үхэр мэт зүтгэх залуусыг яалтай билээ. Тэгээд эрх мэдэлд хүрлээ гэхэд эрх хүүхэд шиг эргээд бууж өгөхгүй зовоох юм залуус.  Тамгаа аваад зугтана, таньдаг хүнээр яриулна, эдгэршгүй өвчтөн мэт эмнэлгийн бичиг хүртэл олоод ирэх юм. Эрх мэдлээр эхнэрээ солих, албан тушаалаар авгай өгч мэдэх залуус олширч буй нь юутай гутамшиг.

Бусдын дэмжлэгтэй суусан албан тушаалаа “Хувийн өмч” гэж ойлгоод “эрх чөлөөнд минь халдлаа” гэж орилж гарна. Хөөрхий муу ахыгаа албан тушаалд очно гэж зовоох, дараа нь буухгүй гэж тамлах.  Албан тушаалтай амь тавин зууралдах залуусын дийлэнх нь шоронд ордог юм билээ шүү. Сүүлдээ бүр Авлигатай тэмцэх газар албан тушаалтай зууралдсан “буг”-нуудыг унагаадаг лантуу болон хувирлаа шүү.

Гэхдээ өндөр боловсролтой, хэтийн зорилготой   залуус албан тушаалын цоо шинэ соёл дэлгэрүүлж эхэллээ. Гадаад хэргийн яамны Төрийн нарийн бичгийн дарга  Б.Болдбаатар өөрийн хүсэлтээр албан тушаалаа өгчихлөө. Төрийн албаны зөвлөл “Энэ албан тушаал дээр сонгон шалгаруулалт явуулах нь зүйтэй” гэсэн зөвлөмж хүргүүлэнгүүт шүү. Түүнийг ажлаа өгөнгүүт Эрдэнэт үйлдвэрийн худалдааны асуудал эрхэлсэн орлогч захирал Х.Өлзий-Орших хадаг барин угтах сурагтай.

Яагаад вэ гэвэл, Х.Өлзий-Орших “Эзний алба ээлжтэй, хааны алба халаатай” гэдгийг дэндүү сайн мэдэх идэрхэн нэгэн гэнэ. Тийм учраас өөрийнх нь албан тушаал дээр Төрийн өмчийн хорооноос  томилогдон ирж буй Болдоо ахыгаа  үүдэндээ хүлээлгээд байхгүй байлгүй дээ. Увс нутгаас гаралтай Х.Өлзий-Орших нь До даргын хамаатан гэдгээрээ гул барих ёстой дургүй.  Албан тушаалаа өөрийн өмч мэт санаад өрөөл бусдад өш хонзон өвөрлөөд явах нэгэн яавч биш.

Энэ хоёр маань эрх мэдлээ өгөлцөх, авалцах гээд сандарч байх зуур Засгийн газрын хуралдаанаар Эрдэнэтийн зэс хайлуулах үйлдвэрийн төсөл уначихдаг л  тоогүй юм болов. Ерөнхий сайд Ч.Сайханбилэгийн зэс хайлуулах үйлдвэр барихыг дэмжсэн саналыг До дарга улаан цайм унагааж (Унагаасан юм уу даа) орхисон гэж дуулдах юм. Ах эгчийнх нь хүү ажлаа өгч буйд өширхөөд тийм зүйл хийх хүн бол биш. Уг нь Эрдэнэт зэс хайлуулах үйлдвэртэй болох хэрэгтэй гэж олон жил ярьсан хүн. Бараг мөрөөдөл нь байсан даа.

Б.Бат

Zaluu.com