Засгийн газар өнөөдөр шинэ бүрэлдэхүүнээрээ ээлжит хуралдаанаа хийнэ. Хуралдаанаар дэд сайдуудын асуудлыг хэлэлцэж, нэр бүхий хүмүүсийг албанд нь томилох талаар эх сурвалж мэдээлж буй.

Өнөөдрийн хуралдааны хэлэлцэх асуудлын дараалалд дэд сайд нарын асуудлыг “Бусад” гэсэн жагсаалтад эрэмбэлсэн бөгөөд хуулийн дагуу ерөнхий сайд Ч.Сайханбилэг танхимын гишүүддээ танилцуулах юм. Мөн энэ үеэр яамдын Төрийн нарийн бичгийн дарга нарыг томилох аж.

Одоогоор дэд сайдуудын нэрс албан ёсоор олон нийтэд зарлагдаагүй байгаа хэдий ч АН болоод “Шударга ёс” эвсэл гурав гурван суудал авах тохироогоо нэгэнт хийгээд амжсан. Тодруулбал, АН-ын зүгээс Дархан-Уул аймгийн АН-ын дарга Н.Мөнхдаш, Дорнод аймгийн АН-ын дарга Н.Цэрэнчимэг, Хөвсгөл аймгийн АН-ын дарга Ч.Батцогт нарын нэрийг дэд сайдад дэвшүүлсэн байгаа.

Харин “Шударга ёс” эвслээс  Эрүүл Мэндийн сайд асан  Н.Удвал, МАХН-ын нарийн бичгийн дарга  Ц.Шаравдорж, МҮАН-ын Ерөнхий нарийн бичгийн дарга Б.Цогтгэрэл нарын нэрсийг гаргаад байгаа гэх. Н.Энхбаярын нарийн сонголтон дор явагдсан эдгээр нэрс харин шийдвэр гарах мөч хүртэл нэг их өөрчлөгдөхгүй гэсэн таамаг бий.

Үлдсэн нэг дэд сайдын суудлыг ИЗНН-д өгөх тохироо нэлээд эрт хийгдсэн. Уг суудалд намын дарга Ц.Ганхуяг болон Төрийн байгуулалт, хууль зүйн асуудал хариуцсан Нарийн бичгийн дарга Р.Булгамаа, Улс төрийн зөвлөлийн гишүүн З.Ган-Очир нарын нэрийг зоогоод байгаа. Эдгээр гурван нэрсийн аль нэг нь дэд сайдын суудлын эрх авах юм.

Ж.Мядагбадам