Хуучин цагийн улсын төв архивт ч байдаггүй, хав дарагдан өнөөдрийг хүртэл нууцлагдсан 1970-аад оны барилгын цэргийн ангид болсон жинхэнэ бослогын үнэн түүхийг  нээн үзүүлэх “Маш нууц” кино  өчигдөр Тэнгис кино театрын өмнөх талбайд нээлтээ хийлээ. 

Албан ёсны трейллер нь цацагдсан цагаасаа хойш үзэгчдийн дунд хүлээлт үүсгээд байсан "Маш нууц"  уран сайхны киноны нээлт шинэ содон зүйлүүдээр дүүрэн байсан нь  цугласан олны талархлыг хүлээсэн юм. Кино нээлтийн үеэр зөвхөн “Маш нууц” уран сайхны киноны нээлтэд зориулан  байгуулагдсан “Маш нууц” хамтлаг ая дуугаа өргөн, гэнэтийн бэлэг барилаа. Маш нууц” хамтлагийн бүрэлдэхүүнд  “Fire” хамтлагийн дуучин Д.Даваадалай, “Nisvanis” хамтлагийн дуучин Амгаа, бөмбөрчин Жерри нар багтсан байв. 

"Маш нууц" кино нь "Fantastic" продакшн, "Red" медиа, "Jiij" продакшны анхны хамтарсан уран бүтээл бөгөөд ерөнхий найруулагчаар "Ноён солиот", "Зүрхэнд шивнэсэн үг" зэрэг киногоороо олны хүндэтгэлийг хүлээсэн МУСТА О.Бат-Өлзий  ажилласан байна. 

Харин ерөнхий продпсераар УДЭТ-ын жүжигчин, МУАЖ С.Сарантуяа, нэгдүгээр найруулагчаар "Миний ах атаман", "Хар сувдны эрэлд", "247 градус" зэрэг сүүлийн үеийн шилдэг кинонуудыг амжилттай найруулсан, УДЭТ-ын жүжигчин МУСТА Б.Тамир ажиллажээ. 

Киноны гол дүрд Ж.Алтаншагай, Г.Лхагвацэрэн, Э.Алдар, Э.Одбаяр, О.Дөлгөөн нар тоглосон бол тулсах дүрүүдэд Ц.Төмөрбаатар /Төрийн соёрхолт/, Д.Бямбацогт /СТА/, Ц.Төмөрхуяг /СТА/, Б.Барслхагва, Б.Баярбат, Э.Баярмагнай, Ц.Амартүвшин, Б.Батсайхан нар  дүр бүтээжээ. 

"Маш нууц"  уран сайхны кино өдөр бүр Тэнгис, Өргөө кино театруудаар гарна.