Парламентын сонгуулийн өмнө шинэ намууд борооны дараах мөөг шиг олширдог. Үүнтэй зэрэгцэн улстөрчид ч шоугаа эхлүүлдэг. Тэгвэл 2016 он гарахад хоёрхон сар үлдсэн цаашлаад сонгууль хаяанд тулсан энэ өдрүүдэд гишүүний суудал горилогсод хэдийнэ шоугаа эхлүүлчихжээ. 

    Өмнөд Солонгост эмчилгээ хийлгэж багагүй хугацаанд гадаадад амьдарсан Н.Энхбаяр хааяа нэг эх орондоо ирдэг байсан бол өдгөө намынхаа зөвлөгөөнийг хийсэн шигээ сонгуульд бэлдэж байна. Түүний хувьд Өвөрхангай аймгийн Хархорин суманд болсон "Анхан шатны байгууллага-2015" Хангайн бүсийн зөвлөгөөнд оролцох үеэрээ Монгол Улсын Ерөнхийлөгч Ц.Элбэгдоржийг “хэлмэгдүүлэгч” хэмээн тодорхойлоод авсан. Түүний хэлсэн үгээс харахад МАХН-ын дарга ирэх сонгуульд нөгөөх л алдартай мега төслүүдэд анхаарал хандуулах бололтой. 

Тодруулбал, тэрбээр  “Эв нэгдлийг авч ирэхийн төлөө МАХН 2016 оны сонгуульд ялах ёстой. Ардчилсан нам, Ардын нам байгаа, МАНАН болж нэгдээд ч энэ эв нэгдлийг авч ирэхгүй. Манай намаас “Мянганы төмөр зам” гэсэн санаачлага гаргаж байгаагаа хэлсэн. Ховд аймгаас Дорнод хүртэл Хархорингоор дайруулаад төмөр зам тавих хэрэгтэй гэж бодож байна. Ингэж байж хөдөөг хоттой ойртуулж, хөгжлийг авч ирнэ. Өөрөөр хэлбэл, хурдан галт тэргээр Ховдын шийгуа авч 1500 км газрыг 10 цагийн дотор туулах болно. Магадгүй таныг унтаад сэрэхэд л ирчихсэн байна. Ийм хурдыг бий болгож байж Монгол Улс хөгжинө. Үүний тулд зам, дэд бүтэц хөгжсөн байх учиртай. 3500 км төмөр зам барихын тулд хөрөнгө мөнгө хэрэгтэй. 

Тавантолгой, Оюутолгой төслүүдээс босгох боломж бас бий. Сүүлийн үед Тавантолгой, Оюутолгой төсөл хамгийн их анхаарал татаж байгаа асуудал. Цаашид ч ийм байна. Манай нам 2012 онд маш зөв бодлого баримталсан. Одоо ч тэр бодлогоосоо ухрах ёсгүй гэж боддог. Энэ юу вэ гэхээр дундын өмч. Өмчийг хоёр хувааж болно. Хэний ч оролцоогүй бий болсон өмчийг дундын өмч болгоё. Тэнгэр, агаар, салхи, ус бол дундын өмч. Харин байшин, хашаа, гэр, машин хувийн өмч. Үүнтэй нэгэн адил Тавантолгой, Оюутолгой дундын өмч. Эдгээр төсөл дундын өмч болсон цагт бид ядуурал гэдэг үгийг мартана. Энэ том төслийг цөөн хэдхэн хүн авч байгаа цагт бид ядуурлаас хэзээ ч салахгүй. Байнга байгалийн баялгийн хараалтай ард түмэн байна” хэмээн ярьжээ. 

Тэгвэл өмнө УИХ-д Хөвсгөл аймгаас сонгогдож байсан Л.Гүндалай тойргоо сольж Орхон аймагт нэр дэвшихээ зарласан. Түүгээр ч зогсохгүй Ардчилсан намаас гарч, “Ард түмнээ хайрлая” гэх шинэ нам байгуулаад амжсан. Ийнхүү шинэ намаа байгуулсан тэрбээр эрдэнэтчүүдэд газар тараана хэмээн нэлээд бужигнаан үүсгээд амжсан юм. Тэгвэл тэрбээр БНН-ын дарга Б.Жаргалсайхантай хамт телевизийн нэвтрүүлэгт оролцсоноор өдгөө цахим ертөнцийн “од” болоод байна. Ийнхүү намрын сэрүүтэй хамт улстөрчдийн сонгуулийн шоу эхэллээ. Хямарсан ард түмний сэтгэлээр бага л наадаасай билээ.