"АСЕМ-11" уулзалтын бэлтгэл ажлын хүрээнд Чингисийн өргөн чөлөө буюу Төв номын сангийн хажууд байрлах түргэн үйлчилгээний цэгийн эзэмшигчдэд урьдчилан мэдэгдэж, шаардах хуудас хүргүүлсэн ч нийтийн эзэмшлийн зам талбайг чөлөөлөөгүй байгаа учир албадан нүүлгэсэн. Энэ ажил цаашид ч үргэлжлэх ажээ. Сүхбаатар дүүргийн Засаг даргын албадан нүүлгэх захирамжийн дагуу хүчээр зөөвөрлөсөн ТҮЦ-үүдийг тус дүүргийн өмч газрын харилцааны албанаас журмын хашаанд байршуулж байгаа юм. Цаашид төв зам дагуу нийтийн эзэмшлийн зам талбайд байрласан зөвшөөрөлгүй түргэн үйлчилгээний цэгүүдийг зөөвөрлөн шилжүүлэх ажлыг холбогдох дүүргүүд хариуцан зохион байгуулж, эзэмшигч иргэн, аж ахуйн нэгжид урьдчилан мэдэгдэхээр болжээ. Угтаа Монгол Улсын холбогдох хуулиудын дагуу шүүхээс албан нүүлгэх захирамж гарсны дараагаар иргэний хувийн өмчид халдах ёстой. Харин дүүргийн засаг дарга болоод холбогдох удирдлагууд Эрүүгийн хуулийн 236 дугаар зүйлд заагдсанаар эрхээ дураараа хэрэгжүүлж иргэдийг хохироож байгаа юм.
ТҮЦ-ИЙГ ШҮҮХИЙН ШИЙДВЭРЭЭР НҮҮЛГЭХ ЁСТОЙ
ХУД-ийн иргэн н.Тогтмаа 23 сая төгрөгийн үнэ бүхий бараатай ТҮЦ-ээ нэг л шөнө хулгайд алдсан тухайгаа "Нийтийн эрхийг хамгаалах холбоо"-нд хандсан. Н.Тогтмаагийн хувьд зохих зөвшөөрлүүд нь байгаа тухай өөрийн биеэр мэдэгдсэн ч СБД-ийн удирдлагууд хүлээж аваагүй юм. Тэгвэл АСЕМ-тай холбоотойгоор цаашид ч ТҮЦ хураагдах бөгөөд жижиглэн худалдаа эрхлэгчид холбогдох дүүргийнхээ журмын хашааг зорьж ТҮЦ-ээ олж авах юм.
Ийнхүү алга дарам газар татвараа төлж амьжиргаагаа залгуулж байгаа иргэдэд төр төмөр нүүрээ үзүүлж, ТҮЦ эрхлэгчид АСЕМ-ийн золиос болж байна.
Эх сурвалж:Nekh.mn
