Монголын банкны салбарт монопольчлолоо тогтоосон банк бол ХААН банк. “ЭРХЭМ ТАНЫ ИТГЭЛТ АНД” гэх сүржин уриагаараа  сурталчилгаа хийж ирсэн тус банк үнэн хэрэг дээрээ бол Монголчуудаас хол, Монголчуудад халтай банк гэдгээ удаа дараа нотлон харуулж байна. Япончуудын хөрөнгө оруулалттай, тэр хэрээрээ мөнгөний урсгал нь гадагшаагаа байдаг тус банкны картын үйл ажиллагаа доголдсоны улмаас хэчнээн Монгол иргэдийн эрх ашиг зөрчигдөж, асуудал үүсч, ард нь амьдралд нь эдийн засгийн хор хохирол учирсныг ХААН банк тооцож суугаа болов уу. Гол нь Монголчуудын олонх нь ХААН банкны картын үйлчлүүлэгч бөгөөд  өдөр тутмын хэрэглээний салшгүй хэсэг нь  картын хэрэглээ болчихоод байгаа ийм үед сүр хүчээ мэдрүүлэн иргэдийг хохироодог нь ямар учиртай болохыг ХААН банкнаас тодруулмаар байна.

Ер нь ХААН банк харилцагчдаа хүндэтгэдэггүй гэдгийг баталгаажуулах бас нэг мэдээлэл бол Монгол Улс даяар хамгийн өргөн сүлжээтэй, хамгийн их  мөнгөн хөрөнгө хуримтлуулсан, хэрэглэгчээ ХААН-д өргөмжилсөн гэж  өөрсдийгөө дөвийлгөдөг ХААН банкныхан иргэдийг бэл бэнчингээр нь ялгаж,  оюутан залууст үйлчлэхгүй гэж ялгаварлан гадуурхаж байсныг эргэн сануулмаар байна. ХААН банкны хувьд VIP зэрэглэлийн үйлчлүүлэгчид нь л хүн болохоос бага  мөнгөөр үйлчилгээ үзүүлдэг оюутан залуус бол огт чухал биш гэдгийг илтгэх баримт бүхий зургийг уншигч та харж байна.

Хуучин Хөдөө аж ахуйн банк гэж байсныг авч ХААН гэж нэрлэн нэрээр нь тоглолт хийсэн нөхдүүд Монголчуудад хүүтэй мөнгө зээлж байгаагаа их буян гэж санаж, элдэв аргаар ДААМ гарах гэж байгаа бол эндүүрч байгаа хэрэг юм. Иргэдэд үйлчлэхдээ баян хоосноор нь ялгаварлана гэж ил тод зарлаж байсан энэ банк Монголчуудад ойр байж чадах уу, Монголчуудад ээлтэй байж чадах уу?

Бас тэгээд болоогүй, бусад банкуудтай харьцуулахад үйлчилгээ нь хамгийн хүнд сурталтай, теллерүүд нь хамгийн харилцаа муутай гэдгийг хэлэх нь зохистой болов уу.

Эх сурвалж: Шуурхай.мн Б.Тамир