МАН, АН-ын удирдлагууд энэ сонгуулиар өөр өөрсдийн намын олигархи, баячуудыг өөр хооронд нь өрсөлдүүлэхээр шийдвэрлэсэн бололтой. Тухайлбал, Баянхонгорт Х.Баттулга Л.Элдэв-Очир нар өрсөлдөхөөр болсон бол Дундговь аймагт Б.Наранхүү Б.Амарсанаа,  Увсад О.Цогтгэрэл, Б.Чойжилсүрэн нар тус тус нэр дэвшиж өрсөлдөх аж.

Баянхонгор аймаг: Х.Баттулга VS Л.Элдэв-Очир

Баянхонгор аймгийн 09 дүгээр тойрогт АН-аас УИХ-ын гишүүн Х.Баттулга, МАН-аас МSC группын дэд ерөнхийлөгч Л.Элдэв-Очир нар өрсөлдөнө.

Энэ тухай Х.Баттулга албан ёсны фэйсбүүк хуудастаа намууд нэр дэвшигчдээ тодруулахын өмнөх өдөр, "Монголын баялагт эзэн суусан "Нүүрсчдийн нам"-н нөхдүүдтэй 2016 оны УИХ-ын сонгуулиар тэмцэцгээе ээ. Манай аймагт МСS-ын тодотголтой "нүүрсчдийн" намын нэг нөхөр яваад л байгаа. Би амлаж авч байнаа" хэмээсэн нь ёсоор болов.

Ямартай ч  МSC- ын Л.Элдэв-Очирын тухайд Баянхонгорт босоо Х.Баттулгын ээлж дараалан байгуулсан ялалтыг энэ удаа тасалдуулж дөнгөх үү гэдэг асуулт сонирхол татаж байна.

Дундговь аймаг: Б.Амарсанаа VS Б.Наранхүү

"Мон Ураны" босс Б.Наранхүүг Дундговьчууд өнгөрсөн удаад төрд төлөөллөөрөө илгээсэн. Гэвч эрхэм гишүүн өнгөрсөн хугацаанд нэг ч хуулийн төсөл санаачлаагүйгээр үл барам чуулганы хуралдаандаа ч тоотой суужээ.  Харин тэрбээр энэ удаад МАН-ын Удирдах зөвлөлийн гишүүн Б.Амарсанаатай өрсөлдөх нь.

Б.Амарсанаагийн тухайд  Дундговь аймгийн ИТХ-ын дарга С.Буджавыг өрөөнд нь зодож танхайрсан гэх дуулианд нэр холбогдоод байв. Харин прокурорын байгууллагаас гаргасан дүгнэлтээр Б.Амарсанаа гүтгүүлсэн болох нь тогтоогдсон аж. Энэ тухай тэрбээр фэйсбүүк хуудастаа, "Ямар ч байсан гүтгэгдсэнээ хуулийн байгууллагаар нотлууллаа" хэмээн бичжээ.

Увс аймаг: О.Цогтгэрэл VS Б.Чойжилсүрэн

Увс аймагт нэр дэвшихээр эртнээс горилсон "Тесо" корпорацийн эзэн О.Цогтгэрэл энэ сонгуулиар Ч.Хүрэлбаатартай өрсөлдөж магадгүй хэмээн яригдаж байв. Үүний улмаас О.Цогтгэрэл нь Central tower-т байрлах оффисын өрөөнөөсөө бусдыг сошиал сүлжээгээр гүтгэж суудаг болохыг Ч.Хүрэлбаатар саявтархан илчилсэн. Үүнд О.Цогтгэрэл одоогоор ямар нэгэн тайлбар хийгээгүй байна.

Тэгвэл тэрбээр мөн л "Хурд" групп-ыг үүсгэн байгуулагч, монголын томоохон толгой баячуудын нэг УИХ-ын гишүүн Б.Чойжилсүрэнтэй учраа таарчээ.

Хөвсгөл аймаг: Б.Эрдэнэбат VS Л.Энх-Амгалан

Хэзээд гал ноцож байдаг Хөвсгөлийн 39-р тойрогт энэ удаад МCS-ийн долоон дэд Ерөнхийлөгчийн нэг гэдгээрээ танигдсан Л.Энх-Амгалан, "Эрэл"-ийн тодотголтой Б.Эрдэнэбат нар өрсөлдөх нь тодорхой болсон.

Хөвсгөл аймгийн 39-р тойрогт өрсөлдөх Л.Энх-Амгалангийн хувьд өдгөө МАН-д харьяалагддаг ч  нэгэн цагт АН-д харьяалагдаж явсан гэдгийг нь хүмүүс андахгүй. Харин "Эрэл" хэмээх компаниараа овоглогдож гарч ирсэн Б.Эрдэнэбат хэмээгч эр "Эх-Орон" намаа орхиж саяхан АН-ыг сонгосон. Тэгэхээр нэг намаар харьяалагдаж, нэгэн цагт харьяалагдаж явсан эдгээр эрхмүүдийн хэн нь энэ удаагийн сонгуульд тодрох бол гэдэг асуултын хариу олны сонирхолыг татаж байна.

Х.Онон