Улаанбаатар хотод сүүлийн өдрүүдэд үгцом дулаарч байгаа бөгөөд маргааш буюу Хүүхдийн эрхийг хамгаалах өдрөөр 28-30 хэмийн дулаан байх тул өөрийгөө болон балчир үрсээ наршихаас сэргийлээрэй.
Тиймээс наранд цохиулахаас сэргийлэх зөвлөмжийг хүргэж байна.
Наршихаас сэргийлэхийн тулд та
- Даралт ихтэй, нас өндөр, хүүхэд багачууд, бие тааруухан, ядаргаа ихэссэн, зүрх судасны өвчин, чихрийн шижин зэрэг хүмүүс гэрээс гарахыг аль болох зайлсхийх
- Нарны малгай өмсөх, нарны хамгаалалтай шүхэр хэрэглэх
- Шингэн ус сайн уух
- Хурц нартай үед наранд удаан хугацаагаар явахгүй байх
Дараах шинж тэмдэг илэрч байвал наршсан гэсэн үг
- Бие суларч тамир тэнхээ алдах
- Толгой эргэж, өвдөх
- Биеийн халуун нэмэгдэх
- Цээж багтран амьсгаа цухалдах
- Царайны өнгө цонхийж цайх,
- Бөөлжис хүрч, дотор муухайрах
- Хөлс гарах нь багасах /ихсэх/
- Нүүр чинэрэн улайж, цээж багтран амьсгаа цухалдах
Хэрэв наршсан бол
- Сэрүүхэн нам тайван газарт шилжүүлэн амруулах, /Сүүдэрт , сэрүүн өрөөнд гэх мэт/
- Бүлээн шингэн уулгах /чихэртэй ус, цэвэр ус/
- Хүйтэн жин тавих
- Арьсны нимгэн хэсэгт хүйтэн жин тавих /мөстэй уут тавих юм уу спиртээр биеийг нь арчих/
- Массажилж, иллэг хийж , цусны эргэлт нь зогсохоос сэргийлэх хэрэгтэй
Нарны хордлого авсан хүнд хамгийн түрүүнд гэрийн нөхцөлд хэвтүүлээд, хөлийг нь бага зэрэг өндөрлөж, хөлнөөс нь сэрүүцүүлэхийн тулд сэнс тавьж болно. Мөн хүйтэн ус толгой дээрээс нь асгах, хүйтэн усанд бүх биеэр нь оруулах, нойтон алчуураар ороож, жин тавих зэрэг энгийн аргуудыг хэрэглэнэ.Нарны хордлогын үед хүний бие шингэнээр дутагддаг учир цэвэр ус, хярам байн байн уух хэрэгтэй. Гэхдээ шингэнийг бага багаар уухгүй бол бөөлжиж мэднэ.
