Олон улсын эрдэмтэд Бээжин хотыг аажмаар газар дор орж байгааг илрүүлжээ. Гүний усыг хэт их хэрэглэж, хотын хөрсний өнгөн давхаргыг эвдэж сүйтгэснээс болж Хятадын нийслэл жилд 11 см-ээр доош сууж байгаа юм байна. Энэхүү нийтлэлийг "Remote Sensing" сэтгүүлд нийтэлжээ. 

 

Судлаачдын хэлснээр хот доош сууж байгаа нь хүн амын аюулгүй байдалд заналхийлж байгаа бөгөөд өндөр хурдны төмөр замын системд ч сөргөөр нөлөөлж мэдэхээр байна. Газрын өндөр ийнхүү өөрчлөгдөж байгаа нь "inSAR"-т дүрслэгджээ.

 

Ялангуяа Бээжин хотын өндөр барилгууд, тойрог замуудаараа алдартай Чаоян дүүрэгт хөрс доош сууж байгаа нь илүүтэй ажиглагджээ. Ийнхүү гадаргын түвшин тэгш бус байдлаар доошлох нь олон давхар барилгууд, авто тээврийн хоолойнуудад ноцтой аюул учруулна. 

 

Бээжин хот нь хэдэн мянган жилийн турш гүний ус хуримтлагдсан тэгш талд оршдог юм. Гэтэл цооног өрөмдөж, гүний усыг ихээр гаргах болсноос газрын гадарга хатаж нягтаршжээ. Тус хотын дүүргүүд, эргэн тойронд нь хэдэн арван мянган гүний худаг, цооног байдаг бөгөөд ихэнхийг нь хөдөө аж ахуй, ургамал ногооны тариалалтад ашигладаг аж.

Эх сурвалж: Өглөөний сонин