Өчигдрийн УИХ-ын чуулганаар Төрийн албатай холбоотой 23.1 дэх "Төрийн жинхэнэ албан хаагчийг хуульд зааснаас бусад үндэслэлээр ажлаас халахыг хориглоно" гэсэн заалтыг хэлэлцэж гишүүд ихэд шүүмжлэлтэй хандаж байв. Төрийн албыг талх шиг зарсан гэдгээ МАН-ынхан үндсэндээ хүлээн завшөөрч “Төрийн алба улстөрийн томилгоо болчихлоо” гэдэг дээр санал нэгдсэн гэсэн үг. Үнэндээ У.Хүрэлсүхийн Засгийн газар бүрдсэнээс хойш төрийн алба талхны дэлгүүр шиг болсныг тус намын генсек Д.Амарбаясгалан өөрөө батлан харуулсан баримт, мэдээллүүдийг хэвлэлүүд хэдэнтээ цацсан. Намын шийдвэр нэрийн дор засаг солигдох бүрт боловсрол мэдлэгтэй мэргэшсэн төрийн албан хаагчдыг олноор нь хоморголон халж төрийн залгамж халааг алдагдуулж байгаа нь хатуу үнэн юм. Хэдхэн хоногийн өмнө буюу баасан гарагт Хотын дарга С.Амарсайхан хоёр газрын даргаа муу ажиллаж байна гэдэг үгээр халхавчлан ажлаас нь чөлөөлөх шийдвэр гаргасан. Энэ мэтээр МАН-ын залуус улстөрийн томоохон хоруудыг гарамгай чадалтай гэсэн хүн болгоныг замаасаа зайлуулж албан тушаалын оргил өөд мацаж санаж зорьсон албан тушаалдаа хүрч чадсан билээ.
Төрийн албыг улстөрийн томилгоо болгосон өөр нэг жишээ болох УИХ-ын гишүүн Х.Нямбаатарын тухай баримттайгаар өгүүлье. Төрийн жинхэнэ алба хаагчдыг мөргөж ногоон гэрлээр дарга болсон эрхмүүд бүгд Х.Нямбаатарын хүмүүс. Тухайлбал, Төрийн банкны үйл ажиллагаа хариуцсан дэд захирлаар О.Баасансүрэнг томилуулсан. Тэрбээр согтууруулах ундаа ууж ажлаа олон хоногоор тасалдаг ч Х.Нямбаатар хамгаалсаар өдий хүргэсэн гэдгийг тус банкны амтай бүхэн ярьж байна. Түүнчлэн Уулын баяжуулах Эрдэнэт үйлдвэрийн Хөгжлийн асуудал хариуцсан орлогч захирлаар П.Энхбатыг,ерөнхий нябод мөн өөрийн хүнийг томилуулсан. Сонгинохайрхан дүүргийн Татварын хэлтсийн даргаар Базарыг томилуулсныг ч бүгд мэднэ. Энэ бүгд УИХ-ын гишүүн, Хууль зүйн байнгын хорооны дарга Х.Нямбаатарын томилгоонууд. Хэрэв уншигч та анзаарсан бол дээрх томилгоог элдэв долоон хачир, чимэг зүүлтгүй УИХ-ын сул гишүүн хийж чадахааргүй юм. Товчхондоо УИХ-ын сонгуулийн дараа төрийн албыг утгаар нь самарч ах дүү амраг садан, найз нөхдөө ашигтай гэсэн бүхий л албанд томилж зүгээр ч нэг дарга биш бүр дэд захирал, орлогч захирал, ерөнхий нябо, татварын хэлтсийн дарга гэсэн эрх мэдэл бүхий чухал албадуудад томилсон нь үүний цаана ямар том эрх ашиг, ашиг сонирхол нуугдаж буйг харуулж байна. Энэхүү томилгоог хэн хийсэн, эдгээр хүмүүс хэний татаасаар энэхүү албан тушаалуудыг сандайлсан бэ гэдгийг тус газрын алба хаагчид өөрсдөө хэлээд өгнө.
Бид дараагийн нийтлэлдээ энэхүү томилгоог үргэлжлүүлэн хүргэх болно.
Эх сурвалж: info5.mn
