Эрдэнэс Тавантолгой ХК-ийн нэгж хувьцааны ногдол ашиг 90 төгрөг бус харин түүнээс хэд дахин их байх боломж байсан уу.
Эдийн засагчдын олонх нь тийм боломж байсан гэх хариултыг өгөх болов. Гэвч ”Эрдэнэс Тавантолгой” ХК-ийн удирдлагуудын үрэлгэн зардлын уршгаар нэгж хувьцааны мөнгө 90 төгрөг дээр тогтож, иргэдийн гар дээр 80 төгрөгөөр эцэслэгдсэн нь энэ.
Авлигатай тэмцэх газрын Мөрдөн шалгах хэлтэс өнгөрсөн долоо хоногт гэмт хэргийн улмаас учирсан 237.0 сая төгрөгийн хохирлыг нөхөн төлүүлсэн нь бий. Тодруулбал, "Эрдэнэс Тавантолгой" ХК нь 237.0 сая төгрөгөөр чанаргүй автобус авсныг тогтоосон нь тэр. Өөрөөр хэлбэл, өнөөх ашигт зардлаас хумсалсан ганц тохиолдол нь.
Эдийн засагч Л.Наранбаатар шахааны хүмүүс тус компанид олноор шургалсан нь “ Эрдэнэс-Тавантолгой”ХК-ийн үйл ажиллагааны зардал “Тавантолгой”компанийнхаас 10 дахин өндөр хэмжээнд хүрч, иргэдэд очих ногдол ашгийг бууруулах нэг шалтгаан болж байгааг мэдээлж байсан удаатай.
Зөвхөн төв оффистоо 242 хүн ажилладаг. Ихэнх нь шинэ даргыг дагалдаж ирсэн эрхмүүд бөгөөд “Монгол оюутны холбоо”-ны угшилтай байх жишээтэй. Ядаж л компанийн гүйцэтгэх захирал нь англи хэл мэддэггүй хэмээн Д.Сумъяабазар салбар хариуцсан сайдаар ажиллаж байхдаа хэлсэн юм даг.
МАН-д шинэчлэлийн салхи сэвэлзүүлнэ хэмээн хашааны гаднаас хашгирч явсан нөхөр албан тушаал авч амаа үдүүлсэн нь ЭТТ-н удирдлага. Удирдлагын зардал нь 2019 оны төсөвт 22 тэрбум төгрөгөөр төсөвлөгдсөн. Чухамдаа энэ нь тус компанийн дарга нарын цалин хөлс, унаа, хоол унд, гадаад, дотоодын томилолтын зардал гэсэн үг.
Түүнийг эл албан тушаалд ирэхээс өмнө “Эрдэнэс Тавантолгой”ХК-ийн удирдлагын зардал 3.5 тэрбум төгрөгөөр төсөвлөгдөж байв. Харин тэр томилогдож ирсэнээс хойш зардал тасралтгүй өссөн. Тодруулбал, 217 онд 12 тэрбум, 2018 оны гүйцэтгэлээр 16.6 тэрбум, өнгөрсөн жил 22 тэрбум болсон нь энэ.
Үнэндээ ч Үндэсний Аудитын газраас “Эрдэнэс Тавантолгой” компанид хийсэн гүйцэтгэлийн аудитын тайланд хөрсний сийрэгжилт гэгч коэффициентийг хэт өсгөж тавиад, зөөгөөгүй хөрсөө зөөсөн болгож бичээд 56 тэрбум төгрөгийн зардал гаргасан тухай бий. Энэ талаар удирдлагууд нь мэдээгүй байсан гэх тайлбар тухайн үед хийж байсан бөгөөд АТГ уг асуудлыг шалгахаар болж байв.
Мөн гадаадын нэг зөвлөх компанид өгөх 283 тэрбум төгрөг, компьютер авах 4.5 тэрбум, программ хангамж авах 8 тэрбум, оффис авах 20 тэрбум төгрөг төсөвлөж байсан. Эдийн засагч Л.Наранбаатар жагсаал цуглаан хийсний хүчинд зарим үрэлгэн зардлыг хасуулж дөнгөсөн. Гэхдээ АТГ-ынхны илрүүлсэнчлэн олон ч шахаа байхыг үгүйсгэх аргагүй. Зөвхөн “1072 мэдээллийн төв”-ийн сарын төсөв нь 30 сая төгрөгийн зардалтай...
Хэрэв энэ бүх үрэлгэн зардлыг хумисан бол иргэд ногдох нэг хувьцааны үнэ тэр хэрээр өсөх байв
Эх сурвалж: Нийгмийн толь
