Өмнөговь аймгийн ИТХ гэдэг байгууллага хууль биелүүлдэггүй дураараа дургиж байдаг газар болоод удаж байгаа билээ. Иргэдээ төлөөлөхөөр сонгогдож байгаа боловч иргэдийнхээ төлөө ажиллахаа болиод удаж буй энэ байгууллагыг хууль бус үйлдэл хийдгээрээ зартай Х.Сугир гэх нөхөр удирддаг. Тэрээр өнгөрсөн гуравдугаар сарын 20-ны өдрийн 10 цагаас Аймгийн иргэдийн төлөөлөгчдийн Тэргүүлэгчдийн хурлыг зарлажээ. Нийт 11 тэргүүлэгч ирэхээс 6 тэргүүлэгч нь ирэх боломжгүйгээ урьдчилан албан бичгээр мэдэгдсээр байтал, намынхаа таван гишүүнийг суулгаж байгаад ирц бүрдээгүй байхад яаран сандран нууцаар хуралдсан юм. Ирц хүрэхгүй байхад өөрийн намын хэдхэн тэргүүлэгчээ дуудаад нууц хурал хийж гаршиж байгаа энэ үйлдэл нь аймгийн хурлын 33 төлөөлөгч болон Өмнөговь аймгийн 70 мянган хүний эрх ашгийг ноцтой зөрчсөн үйлдэл болсон юм. Харин энэ хуралдааныг хууль бус гэж үзэж байгаагаа АН-ын бүлгээс шүүхэд гомдол гаргасан. Энэ дагуу Өмнөговь аймгийн Захиргааны хэргийн анхан шатны шүүх 10 дугаар сарын 02-ны өдөр хуралдаж, Х.Сугирын зохион байгуулсан энэхүү хуралдааныг хууль бус болохыг тогтоолоо. Ийнхүү ирц бүрдүүлэхгүйгээр хуралдаж ард түмнээсээ нууцаар асуудал хэлэлцэж баталсан энэ хуралдаан хүчингүй болж байгаа бөгөөд хуралдаанаар гаргасан шийдвэрүүдийг эргэж харах ч асуудал үүсээд байна.
Түмэн.мн
