Монголын триатлоны холбоо, Монгол Японы найрамдлын нийгэмлэг хамтран Монгол Улсын төрийн далбааг “Токио-2020” олимпийн бамбартай хамт Монгол орныхоо хилийн захын дөрвөн цэгт аялуулах санаачилгыг гаргасан. Энэхүү ажлыг МҮОХ, ХХЕГ, Япон улсаас Монгол Улсад суугаа ЭСЯ болон бусад байгууллага дэмжин ажиллаж байгаа юм.

Энэ хүрээнд арваннэгдүгээр сард Орвог гашууны бор толгойд МҮОХ-ны гүйцэтгэх зөвлөлийн гишүүн, Монгол Японы найрамдлын нийгэмлэгийн ерөнхийлөгч, Монголын триатлоны холбооны ерөнхийлөгч Ц.Сандуй тэргүүтэй баг хамт олон төрийнхөө далбааг мандуулж, Токиогийн олимпод оролцох тамирчдын аз хийморийг даатгасан билээ.

Тэдний энэхүү үйл явдлыг Олон улсын олимпийн хороо (ОУОХ) болон Азийн олимпийн зөвлөл (АОЗ) тус тус тухайн сарын онцлох үйл явдлаар нэрлэж, өөрсдийн вэбсайт болон сэтгүүлд англи, франц, испани, араб хэл дээр нийтлээд байгаа юм.

Мөн манай улсын Триатлоны холбооныхон энэхүү түүхэн аяллаа баримтжуулан телевизийн нэвтрүүлэг бэлтгэхээр болжээ.