Эрүүл мэндийн сайд асан Т.Мөнхсайхан албан тушаалаа хүлээлгэн өгсний дараа эмчийн ажлаа хийгээд эхэлжээ. Гэмтэл согог судлалын үндэсний төв /ГССҮТ/-д 10 гаруй жил мэс заслын эмчээр ажилласан тэрбээр өвдөг, түнхний хиймэл үе шилжүүлэн суулгах, дурангийн мэс засал хийж байгаа аж. Түүнээс зарим зүйлийг тодрууллаа.
-Таныг Гэмтэл согог судлалын үндэсний төвдөө ажиллаж, мэс засал хийж байгаа гэж дуулсан. Энэ үнэн үү?
-Тийм ээ. Би саяхнаас Гэмтэл согог судлалын үндэсний төвд хагалгаагаа хийж байна. Өвдөг, түнхний хиймэл үе шилжүүлэн суулгах мэс заслаас гадна өвдөг, мөрний дурангийн мэс засал хийж, зөвлөх эмчээр ажиллаж байгаа. Сайд байх хугацаандаа хагалгаагаа хийж амжаагүй. Би 2011 оноос хойш 10 жил энэ төрлийн хагалгааг хийж байна. Цаашид мэргэжлийнхээ дагуу ажиллах сонирхолтой байна.
–Энэ хагалгааг ямар оноштой хүнд хийх боломжтой бол?
-Өвдөг, түнхний хиймэл үе суулгах шаардлагатай хүмүүс ихэвчлэн ахмад настан байдаг. Харин дурангийн мэс заслыг ихэвчлэн залуу, спортын тамирчид хийлгэдэг юм.
Тухайн хүний үений өөрчлөлт ямар түвшинд байгааг нарийн оношилсны дараа хагас, бүтэн үе суулгах мэс заслын аль нэгийг сонгоно. Хиймэл үе суулгах мэс засалд орж буй иргэдийн 20-30 хувь нь хагас хиймэл үе суулгах мэс засалд орох боломжтой.
-Гэмтэл согог судлалын төвөөс гадна улсын хэчнээн эмнэлэгт энэ төрлийн мэс заслыг хийдэг вэ?
-Энэ мэс заслаар бие даан хагалгаа хийдэг эмнэлэг гэвэл Гэмтэл согог судлалын үндэсний төв, Улсын нэгдүгээр төв эмнэлэг, Улсын хоёрдугаар төв эмнэлэг. Цаашид орон нутгийн иргэд аймгийнхаа эмнэлэгт энэ хагалгааг хийлгэх боломжтой болох биз. Энэ чиглэлээр мэргэшсэн эмч нар олон болсон.
–Энэ мэс заслын өртөг нь ямар байх вэ?
-Эрүүл мэндийн даатгалаас өндөр өртөгтэй тусламж үйлчилгээний өртгийн 75 хувийг даадаг. Үйлчлүүлэгч үлдсэн 25 хувь буюу хоёр сая орчим төгрөг төлж байна.
-“Монголын түлэнхийн сан”-г байгуулж сайн үйлс хийдэг. Сангийн үйл ажиллагаа үргэлжилж байгаа юу?
-Одоогоор “Монголын түлэнхийн сан” үйл ажиллагаа явуулахгүй байгаа.
-Эрүүл мэндийн салбарт сайдаар ажиллахад хүндрэл бэрхшээл нь юу байв?
-Салбартаа хийе гэж зорьсон, бодож төлөвлөсөн ажил маш их байсан. Өнгөрсөн хугацаанд хийсэн ажлууд дөнгөж эхлэл нь байсан.
-Цар тахлын нөхцөл байдал улам хүндэрч, өдөрт батлагдаж буй тохиолдлын тоо 60, 70, 100-д хүрлээ. Таны хувьд ямар тактикыг хэрэгжүүлэх нь зүйтэй гэж харж байна вэ?
-Сүүлийн үед батлагдсан тохиолдлын тоо улам нэмэгдэх төлөвтэй байна. Салбар яамнаас нөхцөл байдал, цаг үетэйгээ тохирсон арга хэмжээг авах ёстой. Халдвар илрүүлэлтийн хувьд хэнээс шинжилгээ авах, ямар хүнээс үнэгүй, ямар хүнээс төлбөртэй шинжилгээ авах уу гээд лабораторийн хүчин чадлыг зөв тооцоолж шаардлагатай.
Одоо сайн дурынхныг PCR шинжилгээнд хамруулах бус халдвар тараах эрсдэлтэй бүлгүүдээс тогтмол шинжилгээ авч, хянах нь чухал. Эрүүл мэндийн яамнаас цар тахлын эмчилгээний заавар, тактикаа өөрчлөх хэрэгтэй.
-Зарим хүмүүсийн хувьд вакцинжуулалтаа хурдан хийвэл өвчлөлийн тоо буурна гэх юм. Та үүнтэй санал нийлэх үү?
-Цар тахлын эсрэг вакциныг яаралтай хийж эхэлбэл Covid-19 халдвараас илүү өндөр эрсдэл гарч, хүний амь нас хохирч болно шүү дээ. Тэгэхээр вакцинжуулалтын явцыг хурдасгаж болохгүй байх.
Цар тахлын үед алдах эрх байхгүй. Мэдээж хүн ажиллаж байгаа учраас жижиг сажиг зүйл дээр алдаа гаргана. Ерөнхий бодлогын хувьд алдаа гаргаж болохгүй. Бодит тоон дээр тулгуурласан судалгааг үндэслэж, зохих арга хэмжээг авч чадвал эрсдэл багатай даван туулах боломжтой.
А.СҮРЭН
NEWS.MN
