Нийгмийн халамжийн үйлчилгээний зарлага сүүлийн саруудад огцом өссөн нь ковид-ын үед хүүхдийн мөнгийг 5 дахин нэмэгдүүлж 100 мянга, халамжийн сангаас олгодог тэтгэвэр, тэтгэмжийн үйлчилгээг 100 мянгаар нэмэгдүүлж 288 мянга болгосонтой холбоотой аж. Тэгвэл өнгөрсөн сард 2.2 сая хүнд олгосон халамжийн үйлчилгээний 55.8 хувь буюу 1.2 саяыг хүүхдийн мөнгөн тэтгэмж, 16.5 хувийг халамжийн сангаас олгодог тэтгэвэр, тэтгэмж, 10.6 хувийг Эхийн алдар одонгийн мөнгөн урамшуулал, 8.8 хувийг Эх, олон хүүхэдтэй өрх толгойлсон эх эцгийн тэтгэмж, 8.3 хувийг бусад халамжийн үйлчилгээ эзэлж байна. Хөдөлмөр нийгмийн хамгааллын яамнаас 72 төрлийн халамжийн үйлчилгээ үзүүлдэг бөгөөд эдгээрийн дийлэнх хувийг дээрх тэтгэмж, тусламж эзэлдэг байна.