Саяхан болсон Оросын аварга шалгаруулах тэмцээний мөнгөн медальт бөх өөр орны далбаан дор барилдаж магадгүй байна. Улан-Үдэд болсон Оросын аварга шалгаруулах тэмцээнээс Буриадын чөлөөт бөхийн тамирчин Евгений Жербаев мөнгөн медаль хүртсэн. Буриадын тамирчид дотор хамгийн өндөр амжилт гаргасан Евгений одоо 26 настай, олон улсын хэмжээний мастер.  Евгений Жербаев 1994 онд төрсөн.  Авга ахынхаа удирдлага дор долоон настайгаасаа бөхөөр хичээллэж эхэлсэн юм. Дараа нь Улаан-Үдэд ирж дасгалжуулагч Валерий Ивановын шавь болсон. 2015 оноос эхлэн Оросын шигшээ багт орсон юм.  Оросын аварга шалгаруулах тэмцээнд гурван удаа шагналт байр эзэлсэн.  2015, 2019 онд хүрэл, 2021 онд мөнгөн медаль хүртжээ. Мөн 2015, 2020 оны Иван Ярыгины нэрэмжит  тэмцээний хүрэл медалийн эзэн тамирчин билээ.  Оросын шигшээ баг өрсөлдөөн ихтэй тул түүнийг өөр улсын далбаан дор барилдаж магадгүй гэж дөрвөн жилийн өмнөөс яригдаж байгаа. Евгений Жербаевын 2017 онд өгсөн ярилцлагыг “Буряд Үнэн” сонинд дахин нийтэлсэн байна. Уг ярилцлагадаа “....Дэлхийн аваргаас илүү Оросын аваргад ялалт байгуулах хэцүү. Өрсөлдөөн ихтэй. Кавказ тамирчид сайтай. Орос орон их том, олон бөхчүүдтэй, Олимпод зөвхөн найман тамирчин л явдаг. Хэрвээ Монголын нэрийн өмнөөс оролцох тийм боломж олдвол, би ашиглана” гэж хэлсэн байна.

Өөр орны далбаан дор тэмцээнд орох тохиолдол тамирчид дунд элбэг байдаг. Буриадад ийм тохиолдол байсан. Федор Махутов агсны шавь Базар Базаргуруев нь Киргизийн далбаан дор барилдаж байсан. Түүний гол эхлэл нь Бээжин-2008 Олимп байсан юм. Тэр үед тэрээр Оросын шигшээ багийн тавд бичигддэг байсан бөгөөд Олимпийн тоглолтод оролцож боломжгүй байжээ. Тиймээс Базар Базаргуруев Киргизийн далбаан дор оролцон Олимпийн наадмаас хүрэл медаль хүртсэн юм. Гэхдээ шагналаа тэрээр бараг 10 жилийн дараа авсан түүхтэй. Олимпийн наадамд  шагналт V байрт орсон боловч 2017 онд допингийн шинжилгээг дахин шалгаж үзэхэд мөнгөн медаль авсан  Украйны тамирч­наас хориотой бодис илэрчээ. Тиймээс Базар­гуруевын амжилт урагшилж,  тэрээр Буриадын түү­хэнд чөлөөт бөхөөр олим­пийн медаль авсан анхны тамирчин болсон юм. Буриадын тамирчин Арсалан Будажапов одоо Киргизийн далбаан дор барилдаж байгаа билээ. Тэрээр 2019 оноос эхлэн Киргизийн өмнөөс тэмцээнд оролцож 2020 онд Азийн аваргын алтан медаль хүртсэн.