Эмнэлэг хөдөлмөрийн магадлах комиссын гишүүдийг чадавхжуулах төв болон говийн бүсийн сургалт Дархан-Уул, Өмнөговь аймагт зохион байгуулав

Улсын хэмжээнд хөдөлмөрийн чадвар алдалтын хувь, хугацаа тогтоолгосон хүний тоо 2021 оны эцэст 105.6 мянга байгаа нь 2020 онтой харьцуулахад 5.0 мянгаар буурсан үзүүлэлтэй байна. Энэ нь хөдөлмөр, нийгмийн хамгааллын яам улсын хэмжээнд хяналт шалгалтын ажлыг холбогдох байгууллагатай хамтран эрчимтэй явуулсантай холбоотой.

Хөдөлмөр, нийгмийн хамгааллын яам Эмнэлэг хөдөлмөрийн магадлалын үйл ажиллагааг сайжруулах зорилгоор “Эмнэлэг хөдөлмөрийн магадлах комиссын дүрэм”-ийг Засгийн газрын 67 дугаар тогтоолоор шинэчлэн батлуулж, холбогдох журам, заавар, жагсаалтыг Эрүүл мэндийн яам, Нийгмийн даатгалын ерөнхий газрын дэргэдэх Эмнэлэг хөдөлмөрийн магадлах төв комисстой хамтран шинэчилсэн.

Эмнэлэг хөдөлмөрийн магадлалын эрх зүйн баримт бичгийн шинэчлэлийн ажлын нэг нь Эрүүл мэндийн сайд, Хөдөлмөр, нийгмийн хамгааллын сайдын 2021 оны А/758/А/197 дугаар хамтарсан тушаалаар шинэчлэн баталсан “Даатгуулагч (иргэн)-ийн хөдөлмөрийн чадвар алдалтыг тогтооход баримтлах өвчний жагсаалт, хөдөлмөрийн чадвар алдалтын хувь хэмжээ, хугацаа” юм.

Шинэчлэн батлагдсан өвчний жагсаалтыг 2022 оны 04 дүгээр сарын 01-нээс мөрдөхтэй холбоотой улсын хэмжээнд бүсчилсэн сургалтыг яам, Эмнэлэг хөдөлмөрийн магадлах төв комисс хамтран зохион байгуулж байна.

Энэ ажлын хүрээнд Дархан-Уул, Өмнөговь аймагт 2022 оны 03 дугаар сарын 10-11-ний өдөр “Үйлдвэрлэлийн осол, мэргэжлээс шалтгаалсан өвчний хөдөлмөрийн чадвар алдалтыг тогтоож буй бодлого зохицуулалт” сэдэвт Төвийн болон Говийн бүсийн сургалтыг зохион байгууллаа.

Сургалтад Төвийн бүсийн хувьд Дархан-Уул, Орхон, Хөвсгөл, Сэлэнгэ, Төв, Архангай, Өвөрхангай зэрэг 7 аймаг, Говийн бүсийн хувьд Өмнөговь, Дундговь, Баянзүрх, Баянгол, Хан-Уул, Сонгинохайрхан, Сүхбаатар, Чингэлтэй дүүргийн Эмнэлэг хөдөлмөрийн магадлах комиссын орлогч дарга, магадлагч эмч, төрөлжсөн мэргэжлийн эмч нар, нийт 40 орчим гишүүд, эмч, мэргэжилтнүүд оролцож байна. Энэхүү сургалтыг Хөдөлмөр, нийгмийн хамгааллын яамны Нийгмийн даатгалын бодлогын хэрэгжилтийг зохицуулах газрын дарга Б.Батжаргал, Өмнөговь аймгийн засаг даргын орлогч Н.Баяржаргал нар тус тус нээж үг хэлсэн ба Хөдөлмөр, нийгмийн хамгааллын яам, НДЕГ-ын дэргэдэх Эмнэлэг хөдөлмөрийн магадлах төв комисс, ЭМЯ-ны дэргэдэх дотор, мэдрэл, сэтгэц, чих, хамар, хоолойн өвчний мэргэжлийн салбар зөвлөлийн мэргэшсэн эмч нар оролцож хичээл зааж, мэдээлэл өгөв.

Энэхүү сургалт нь эмнэлэг хөдөлмөр, магадлалын талаар баримталж буй бодлого, эрх зүйн зохицуулалт ялангуяа Эрүүл мэндийн сайд, Хөдөлмөр, нийгмийн хамгааллын сайдын 2021 оны А/758/А/197 дугаар хамтарсан тушаалыг хэрхэн хэрэгжүүлэх талаар нэгдсэн ойлголт өгч байгаагаараа ач холбогдолтой болж байна.