Итгэл дүүрэн хичээлийн шинэ жил инээд дүүрэн эхлэв
Сүүлийн олон жилд тохиогоогүй баяр хөөртэй хичээлийн шинэ жилийн нээлт болж байгааг юу юунаас анзаарч болно. Үр хүүхдээ хөтөлсөн эцэг эхчүүдийн баяр хөөртэй царайнаас ч, багш сурган хүмүүжүүлэгчдийн харцнаас ч есдүгээр сарын 1-ний өнгийг харж болно. Аливаа зүйл өнгөнөөсөө гэдэг дээ.
Энэ жилийн есдүгээр сарын 1 олон онцлох зүйлээр хүүхэд багачуудаа угтана гэсэн гэгээлэг мэдээг өнгөрөгч зунаас БШУ-ны сайд Л.Энх-Амгалан болон албаныхан өгч эхэлсэн. Олон жил хичээлийн шинэ жилийн нээлтнээс эхлээд шаналсан эцэг эхчүүд итгээгүй байж магадгүй. Ямартай ч салбарын сайд маань сургууль, цэцэрлэгийн тоог нэмнэ гэсэндээ хүрчээ. Монгол Улс даяар сургууль, цэцэрлэг 100 хувь танхимаар нээгдэх боломж бүрдсэн гэдгийг албаныхан ч ам дүүрэн хэллээ, эцэг эхчүүд ч хэллээ. Уг нь жилийн жилд сургуулийн өмнөх боловсролд хамрагдаж чадалгүй 40 шахам мянган хүүхэд ямар нэгэн байдлаар үлддэг байсан бол энэ жил 100 хувь хамрагдаж чадсан. Ихэнх нь цоожтой хаалганы цаана үлддэг байв.
Мөн авлига авдаг ерөнхий боловсролын сургуульд тусгайлан шалгалт хийж, энэ байдлыг таслан зогсооно гэж хэлсэн дагуу ажиллалаа. Энэ бол нэр бүхий хэдхэн сургууль дээр үүрлэсэн зүйл байсан нь илааршиж байгааг ч хэлж байна. Юу юунаас чухал зүйл гэвэл сурган хүмүүжүүлэгч багш нарын цалин, ахуй хангамжид анхаарч, ур чадвараар нь үнэлэх, ажлын байрны тогтвортой байдлаар хангах зэрэг олон зүйл төлөвлөж, эхнээсээ хэрэгжиж эхэлсэн нь ч багш нарын урмыг сэргээж байгааг тэд онцолж байв. Энэ жил хичнээн мянган сурган хүмүүжүүлэгч урам зоригтойгоор хичээлийн шинэ жилийн нээлтэд хүрэлцэн ирсэн бол.
Бас нэг зүйл гэвэл ерөнхий боловсролын сургуулиудад боловсролын үнэлгээний тогтолцоог эхлүүлж байгаа. Чанартай боловсрол олгох чухал байдаг. Ингэхийн тулд хүүхдүүд ямар гараанаас эхэлж буйг бид мэдэж байх ёстой. Өнгөрсөн жил гарааны оношилгоо хийж байсан, энэ намар ч хийх аж. Гэхдээ энэ нь шалгалт биш гэхээр нийтээр хамрагдаж, хүүхдийнхээ сурлагийн түвшин чухам хаана явааг мэдэх боломжтой. Эндээс үүдэж л өнөөх хоцрогдол энэ тэр арилна. Үүнээс гадна 1-5 дугаар ангийн хүүхдүүдэд "Үдийн хоол" өгч, сургууль бүрд сэтгэлзүйч ажиллаж байгаа нь ихээхэн үр дүнтэй байгааг багш нар онцолж байв.
Саяхан л сургууль, анги танхим хүрэлцэхгүй, гурван ээлжээр хичээллэж, харанхуйд хүүхдээ тосох эцэг эхчүүдийн шаналан, тосох боломжгүй хүүхдүүдийн айдас хүйдэс гээд юу эс мундах билээ. Харин энэ жил хоёр ээлжээр хичээллэх боломжтой болсон нь ч бас нэгэн гэгээлэг мэдээ юм.
Их дээд сургуулийн тогтолцоо, сурах орчинд ч эрс шинэчлэл хийсэн. Тэр тусмаа сургалтын чанарт ихээхэн анхаарч ажилласан. Саяхан чанарын шаардлага хангаагүй хэд хэдэн дээд сургуулийг хаасан. Чанар стандарт хангаагүй эдгээр сургуулиуд залуусын ирээдүйг хорлож байсан гэхэд хэтийдсэн зүйл болохгүй. Үүний зэрэгцээ магистр, докторын цолтой эрдэмтдийг шигших шалгалт явуулахаар болж байгаа нь ч Монголын ирээдүйд анхаарч байгаа нэгээхэн жишээ. Аанай л улсын томоохон их сургуулиудад авлигын шинжтэй үйл явдал өрнөж байдгийг таслан зогсоох тухай ярьж байсан. Өнөөдөр “МУИС-д орох гэсэн төдөн төгрөг, АШУИС-д орох гэсэн төдөн төгрөг гэнэ” гээд ярьж байдаг нь нууц биш болсон зүйл. Сурах хүсэлтэй залуус ирээдүйнхээ төлөө авлига өгнө гэж юу байхав. Үүнийг таслан зогсооно гэдэг юу юунаас чухал. Ерөнхий боловсролын сургууль, их дээд сургуулийн хичээлийн шинэ жилийн нээлтэд хүрэлцэн очсон эцэг эхчүүд, багш сурган хүмүүжүүлэгчид Боловсролын сайдаа магтаж байгаагаас харахад энэ салбарт гэрэл гэгээ туссан гэдгийг анзаарч болно.
Ямартай ч шинэ хичээлийн жилийн нээлт, айсуй өдрүүдэд угтан ирэх баяр жаргалтай мөчүүд ийнхүү эхэлж байна. Ямартай ч Л.Энх-Амгалан сайдтай салбар яамныхан эрвийх дэвийхээрээ ажиллаж, боловсролын тогтолцоо болон, сурах орчинд эрс шинэчлэл хийснийг энэ жилийн хичээлийн шинэ жилийн нээлт харуулж байна. “Гараа сайн бол бариа сайн” гэдэг. Есдүгээр сарын 1-ний өдөр хичээлийн жилийн гараа сайн байна. Хэтдээ ч хэрэгжүүлэхээр төлөвлөж буй ажил үйлс бүхэн бүтэмжтэйгээр барианд орно гэдэг мянга, мянган эцэг эхчүүд ерөөж байна.
Эх сурвалж : Түмэн.мн
