Ч.Хоролсүрэн дахиад л агаарын тээврийн салбарт асуудал дагуулж эхэллээ

Цар тахлын хуулийн үйлчлэл зогссоноор Засгийн газрын шийдвэрийн дагуу ИНЕГ-ын дарга С.Мөнхнасан өнгөрсөн долоо хоногт ажлаа өгсөн билээ. Түүнийг ажлаа өгсөн даруй Ч.Хоролсүрэн эзэнтэй “Монголиан Эйрвэйс” компани оны өмнө ЗТХ-ийн сайд С.Бямбацогтыг байлцуулан сүр дуулиантай хүлээн авч байсан шинэ онгоцоороо нисэх зөвшөөрөл хүссэн хурлыг шуурхай явуулж, улмаар 2022.01.13-ны өглөө 07:23 цагт Ханой руу зорчигч тээвэрлэн нислэг үйлдсэн байна.

Нислэг үйлдэх зөвшөөрлийг нэгдсэн ажлын хэсгийн болон бусад чиглэл хариуцсан байцаагч нартайгаа зөвшилцөж, дүгнэлт гаргуулж хийдэг бол “Монголиан Эйрвэйс” үүнийг зөрчиж, зөвхөн нислэг талаас ганц байцаагчийн “үзэмж”-ээр зөвшөөрлийг гаргуулсан гэх мэдээлэл байна.

Олон улсад мөрддөг стандартын дагуу онгоцнууд аеродромыг 10-аас доошгүй цагийн шөнийн нислэг багтааж, нийт 100 цаг ниссэний дараа зорчигч тээвэрлэх эрхээ авдаг бол Ч.Хоролсүрэнгийн “Монголиан Эйрвэйз” ХХК компани нь 50 цаг орчмын нислэг үйлдсэн бөгөөд нислэгийн аюулгүй байдал, нисэхийн дүрэмд заасан шаардлагаа биелүүлж байж зөвшөөрлөө авах боломжтой талаар ИНЕГ-аас зөвлөмж өгч байсан ч тэрээр танилын сүлжээ ашиглаж, зөвшөөрлөө хүчээр гаргуулах шахалтыг ИНЕГ-т удаа дараа илэрхийлж байжээ.

Гэвч “Монголиан Эйрвэйз” ХХК алдаа дутагдлаа засахгүй, шалгалтын нислэгийн цагаа гүйцээгээгүй онгоц дээр зөвшөөрөл авахаар янз бүрийн арга хэрэглэн, шаардлага тавьсан ИНЕГ-ын байцаагч нарыг “Ажил гацааж байна, мөнгө нэхсэн” гэх мэтээр нийтэд мэдээлж, ЗТХ-ийн сайд С.Бямбацогтод хандсан байна.

“Шинэ” онгоцны нээлтэд нь очсон С.Бямбацогт сайд “Монголиан Эйрвэйз” ХХК-ийн талаас өгсөн мэдээллийг яамныхаа шуурхай хурал дээр онцолж, зөвшөөрлийг нь хурдан гаргах чиглэл өгсөн гэх бөгөөд энэ дагуу дээрх процесс өрнөсөн гэх хардлага ч байна. Дашрамд дурьдахад “Монголиан Эйрвэйс” компанийн эзэн Ч.Хоролсүрэн нь ТӨХ-ны дарга Д.Сугартай хамтран, МИАТ-ийн “Дайны эрсдлийн сан”-гаас их хэмжээний мөнгө угаасан хэргээр яллагдаж байсан, хэд хэдэн агаарын тээврийн компани үүсгэж, түүнийгээ дамлан зардаг гэгддэг нэгэн юм.

Д.Даш

“Хүүхдийн мөнгийг хүүхэд бүрд“ жагсаал болж байна
Нүүрсний хэрэгт холбогдуулан УИХ-ын гишүүн А.Адъяасүрэнг яллагдагчаар татах тогтоол гарчээ
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!