“Азийн Хөгжлийн Банк” болон “Уур амьсгалын ногоон сан”-гийн санхүүжилтээр “Ногоон орон сууц төсөл”-ийг нийслэлээс хэрэгжүүлж байгаа аж.

Төслийн хүрээнд газрыг орон сууцаар солих талаар Сонгинохайрхан дүүргийн наймдугаар хорооны иргэдэд таниулах үйл ажиллагааг өчигдөр зохион байгуулжээ.

“Ногоон орон сууц төсөл”-ийн хүрээнд Баянхошуу дэд төвд 2,260 айлын ногоон орон сууцны төсөл хэрэгжих бөгөөд 2023-2025 онд 336 айлын орон сууцны барилгын ажил хийгдэнэ.

Тэгвэл энэ оны дөрөвдүгээр улиралд эхний ээлжийн 110 айлын орон сууц ашиглалтад орох юм. Тус 110 айлын орон сууцанд Сонгинохайрхан дүүргийн наймдугаар хорооны иргэд өөрийн өмчлөлийн газар болон үл хөдлөх хөрөнгөө хөндлөнгийн итгэмжлэгдсэн үнэлгээний компаниар үнэлгээ хийлгэж, орон сууцаар дүйцүүлэн солих нөхцөл бүрдлээ. Газрыг орон сууцаар солихдоо иргэдийг түрээсийн орон сууцаар хангах аж.

Төслийн танилцуулгын үеэр нийслэлийн засаг даргын нэгдүгээр орлогч П.Сайнзориг “Баянхошуу дэд төвийг тойрсон орон сууцжуулах бодлогыг ногоон орон сууц чиглэлээр төлөвлөсөн. Өөрөөр хэлбэл эрчим хүчний хэмнэлттэй, иргэдэд ээлтэй орчин бүхий орон сууцны хороололтой болно.

Энэ орчим Ерөнхий сайд болон хотын даргын дэвшүүлж буй “20 минут”-ын хот болох эхний цэг болж байна. Эхний ээлжийн эхний блок болох 110 айлын орон сууц 2024 онд ашиглалтад орно.

Тиймээс энэ хавраас дараагийн ээлжийн 446 айлын орон сууцны хорооллын бүтээн байгуулалтын ажлыг эхлүүлнэ. Эхний ээлжийн блокт Сонгинохайрхан дүүргийн наймдугаар хорооны иргэд та бүхэн газраа орон сууцаар солих боломжтой.

Ингэснээр дараа, дараагийн бүтээн байгуулалтын ажил хурдсах давуу талтай. Газрыг орон сууцаар солих ажил энэ сарын 18-наас эхэлнэ” хэмээн ярьжээ.

Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС