“Сувилахуйн тусламж үйлчилгээний чиг хандлага ба сувилахуйн боловсрол” хэлэлцүүлэг зохион байгуулсан нь нүдээ олсон зүйл хэмээн салбарынхан хэлж байна. Учир нь Монгол Улс эмчийн тоогоор дэлхийд тэргүүлдэг ч эрүүл мэндийн салбарт нэн чухал байгаа сувилагч 13000 орчим дутагдалтай байгаа аж. Тиймээс Ерөнхийлөгчийн Эрүүл мэнд, спортын бодлогын зөвлөх Т.Мөнхсайхан тус арга хэмжээнд оролцож, стратегийн ач холбогдол бүхий арга зүйн зөвлөгөө өгсөн нь эрүүл мэндийн салбарын төдийгүй нийгмийн анхаарлыг татаад байна.

Учир нь Ерөнхийлөгчийн Эрүүл мэнд, спортын бодлогын зөвлөх Т.Мөнхсайхан Нэгдүгээрт, сувилагч мэргэжлийг яагаад сонгох ёстойг өнөөгийн хүүхэд залуучуудад сурталчлах, хоёрдугаарт, сувилагч мэргэжлийг бэлтгэж байгаа байгуулагуудын чанар хүртээмжийг сайжруулах, сургалтын төлбөрт ямар ямар зохицуулалт хийхээ тодорхой болгох, гуравдугаарт, сувилагчаар төгссөн хүмүүс мэргэжлээрээ ажиллахгүй өөр ажил хийх, гадагшаа явах шалтгаан нөхцөл юу байна гэдгийг тодруулж, нийгмийн асуудлуудыг нь шийдвэрлэх, цалинг нэмэгдүүлэх шаардлагатай байна гэсэн гурван зүйл хэлсэн.

Үүнээс гадна тэрбээр дэлхийн бусад улс орнуудад нийгмийн эрүүл мэндийн сувилагч байдаг бөгөөд эдгээр сувилагч анхан шат буюу сум дүүргийн өрхийн эмнэлгүүдэд ажиллаж, урьдчилан сэргийлэх, өөрийгөө хамгаалах тухай нарийн мэдээллүүд өгч ажилладаг. Харин манайх энэ төрлийн сувилагч нарыг бэлтгэж чадахгүй байна. “Эрүүл монгол хүн” үндэсний хөдөлгөөний хамгийн гол зорилго бол ард иргэдээ эрүүл байлгах. Энэ зорилгын нэг том хэсэг бол нийгмийн эрүүл мэндийн сувилагч бэлтгэх тал дээр анхаарч ажиллана гэдгийг онцолсон.

Дашрамд дурдахад дэлхийн улс орнууд хүн амын өвчлөл, эрүүл мэндийн тусламжийн хэрэгцээнд тулгуурлан шаардлагатай чиглэлийн сувилагчийг бодлогоор дэмжин бэлтгэдэг. Тухайлбал, 1000 хүн амьд ногдох сувилагчийн тоо Швейцарт 17.9, Норвегид 17.8, Австралид 12.2 байхад манай улсад 4.1 байгаа гэх статистик бий.