Хотын Ерөнхий менежер Ц.Төрхүү нийслэлийг эзгүйчилж байна

Энэ жилийн баяр наадмын шилийг даран, Монгол Улсын хэмжээнд олон сум 100 жилийн ойн баяраа өргөн дэлгэр тэмдэглэж, өдгөө ч үргэлжлэх аж. Тиймээс Улаанбаатар хотын суугуул, орон нутгийн уугуул иргэд тус тусын сумын ойн баярыг зорин явсан. Нөгөө талаар сургууль цэцэрлэгийн хүүхэд, оюутнууд амарч, төр болон хувийн хэвшлийн алба хаагчид ч амарчихсан энэ үед Улаанбаатар хотын Ерөнхий менежер Ц.Төрхүү болон түүний баг Захирагчийн ажлын албаныхан нийслэлийг жинхэнэ утгаар нь эзгүйчилж байна.

Учир нь тус албаныхан иргэд ойн баяр наадам, амралт зугаалга гэж байх хойгуур зам харгуй, дулааны шугам сүлжээ, цэвэр, бохир усны дамжуулах хоолой гээд хот тохижуулах болон өвөлжилтийн бэлтгэлээ базаах гэж өдөр шөнийн 24 цагаар амралтгүй ажиллаж байгаа нь нийслэлийн аль ч дүүрэг, хорооны нутаг дэвсгэрт очсон илтэд харагдана. Ёстой л ажил буцалж байна.

Арга ч үгүй, нэг сар хагасын дараа гэхэд Улаанбаатар хотын “унаган” гэж болох хөдөлгөөн эхлэнэ. Амарсан, наадсан хүмүүс ч ирнэ. Үүний дараа оюутнууд ч ирнэ. Улмаар хичээлийн шинэ жил эхэлнэ. Тэгэхээр Захирагчийн ажлын албаныханд үлдэж буй сар гаруйханы хугацааг ийнхүү 24 цагийн турш ашиглахаас өөр аргагүй учраас амралтгүй ажиллаж байгаа хэрэг.

Одоогийн байдлаар Зуун айлын уулзвараас Сэлбийн гүүр хүртэл 900 мм голчтой 392 метр урт цэвэр усны шугамын угсралт, Драмын театрын урд талаас Багшийн дээдийн уулзвар хүртэл 2а магистралийн 350 мм голчтой шугамыг 530 мм голчтой болгон 950 метр өргөтгөн шинэчлэх дулаан болон цэвэр усны шугам шинжэлэхээс эхлээд газар доорх хотын аюулгүй байдал, шинэчлэлийн ажил нийслэл даяар өрнөж байна.

Мөнхүү Сонгинохайрхан дүүргийн 20, 32 дугаар хороо, Сонсголонгийн уулзвараас баруун аймгууд салдаг уулзвар буюу хуучнаар 22-ын товчоо чиглэлийн 9.5 км авто замыг хэсэгчлэн шинэчлэх, Чингэлтэй дүүргийн 24 дүгээр хороо Санзайн зам, Ар согоотын автобусны буудал орчимд борооны ус зайлуулах 560 метр шугам угсрах, Хан-Уул дүүргийн 10 дугаар хорооны ашиглалтын шаардлага хангахгүй болсон 34, 35 дугаар байрыг буулган, шинээр 96 айлын орон сууц барьж байгааг хугацаанд нь ашиглалтад өгөх зэрэг маш олон ажил өрнөсөөр. Захирагчийн ажлын албаныхан ёстой л Улаанбаатар хотыг эзгүйчилж байна.

Драмын театрын урд талаас Багшийн дээдийн уулзвар хүртэл 2а магистралийн дулааны шугамыг өргөтгөн шинэчилж байна