Дэлхийд гайхагдсан “Монгол уран нугаралт нь эдүгээ дэлхийн циркийн тавцанд "Сонгодог" төрөл болон хөгжлийнхөө шинэ шатанд хүрээд байгаа билээ. Тэгвэл Улаанбаатар хотод олон улсын уран нугараачдын наадам эхэллээ.
Анх 2023 онд АНУ-ын Лас Вегас хотноо МУГЖ Ж.Эрдэнэчимэгийн санаачлагаар зохион байгуулсан “Уян” олон улсын уран нугараачдын наадам хоёр дахь удаагаа уран нугаралтын өлгийн нутагтаа зохион байгуулагдаж байна. Наадам өнөөдөр “Олон улсын уран нугараачдын чуулган”-аар эхэллээ.
Энэ наадмыг Нийслэлийн Засаг даргын Тамгын газрын дэмжлэгтэйгээр зохион байгуулж байгаа бөгөөд энэ жилээс эхлэн хоёр жилд нэг удаа Монгол улсад зохион байгуулж байхаар шийдвэрлэжээ.
“Уян” олон улсын уран нугараачдын наадмын ерөнхий зохион байгуулагчаар “Улаанбаатар цирк”-ийн хамт олон ажиллаж, “Монголын уран нугаралтын холбоо”, “Улаанбаатар” театр, Нийслэлийн Соёл, урлагийн газар хамтран зохион байгуулж, байгаа юм.
Энэ үеэр бас нэгэн баярт үйл явдал тохиосон нь "Улаанбаатар цирк"-ийн уран нугаралтын багш Б.Түмэнжаргал Төрийн дээд одон медаль болох "Алтангадас" одонгоор энгэрээ мялаалаа.
Хоёр дахь жилдээ болж буй энэ наадамд монголын уран нугараачид төдийгүй АНУ, Япон болон Европын олон орнуудаас мэргэжлийн уран нугараачид оролцохоор хүрэлцэн ирж, чуулганы үеэр өөрсдийн гайхамшигтай үзүүлбэрээс сонирхууллаа.
“Уян” олон улсын уран нугараачдын наадам энэ сарын 8-ны өдөр “Улаанбаатар театр”-т ялагчаа тодруулна.
