WNBA-д энэ улирлаас эхлэн тоглож буй Кэйтлин Кларк шинэ дээд амжилтуудын эзэн болж, телевиз болон олны анхаарлыг улам бүр татсаар байна. Тиймээс ч зөвхөн эмэгтэй гэлгүй зарим эрэгтэй тамирчид хүртэл богино хугацаанд өндөр алдар нэрд хүрч буй бүсгүйд атаархаж, дургүйцэх хандлага гарч буйг Чарльз Баркли ярьсан юм. Тэгвэл Чарльз Барклигийн энэхүү дүгнэлтийг Шакил О`Нил үгүйсгэж, Кэйтлин Кларкт зохих хүндлэлээ хүлээхийн тулд цаг хугацаа хэрэгтэй гэжээ. “Мэргэжлийн хүрээнд атаархалт байдаг. Ер нь нэгнээ мэдэх хүмүүс л бие биедээ атаархдаг. Жишээлбэл, би Стефен Көррид атаархах юм. 60 сая ам.долларын цалин аваад байгаа хүнд атаархаж байгаа хэрэг. Гэвч амьдрал өөрөө ийм юм. Кэйтлин Кларкийн хувьд аливаа юм тийм хурдан олддоггүй гэдгийг ойлгох хэрэгтэй. Хүндлэл хүлээхийн тулд тодорхой хугацаанд хөдөлмөрлөх ёстой. Чарльз Баркли ч энэ замыг туулсан. Би ч гэсэн. Тийм ээ, Кэйтлин сайн юм. Гэхдээ хүндлүүлэхээр хэмжээнд хүрээгүй байна. Тэгэхээр тайван бай. Энд бас Дайана Таурази, Эйжа Уилсон байна. Хэрвээ Кэйтлинийг үнэлж, хүндэлж буйгаа илэрхийлэхийг хүсч байгаа бол эхлээд тэднийг хүндлэх хэрэгтэй. Ер нь тэгээд Чак шиг чалчаа юмнууд дургүйцэх, атаархалтын тухай ярих дэмий. Энэ чинь атаархалт биш. Кэйтлин Кларк хичнээн сайн тамирчин мөн байж болох ч гэлээ энэ лигт маш сайн тоглож байгаа, тоглож байсан олон өөр тамирчид бий. Өөрөөр хэлбэл, бүх юм жам ёсоороо ээлж дарааллаараа байх ёстой” хэмээн Шак өгүүлжээ.