“Бишрэлт”-ийн Б.Ундармаа гэхээр хүмүүс танина. Учир нь “Капитал” банкыг дампууруулсан, Хөгжлийн банкнаас зээл аваад төлөөгүй, яллагдаж байсан гэх мэтээр таньж таарна. Тэгвэл түүний хүү “Бишрэлт групп”-ийн гүйцэтгэх захирал А.Чинбишрэлт “Монгол мах экспо” компанитай хамтран мах боловсруулах төв байгуулах төсөл хэрэгжүүлэхээр 2017 онд Хөгжлийн банкнаас 31.9 тэрбум төгрөгийн зээл аваад өнөөг хүртэл төлөөгүй бөгөөд зориулалтаар нь ч зарцуулаагүй юм. Үүнээс гадна 2018 онд Хатуу тунгагдсан эмийн болон дуслын шингэний үйлдвэр байгуулахаар 7.27 тэрбум төгрөг гээд нийт 40 орчим тэрбум төгрөг аваад төлөөгүй юм байна.

Энэхүү мөнгө Хүнсний 50 дугаар дэлгүүрийн баруун урд байрлалтай Монгол ном оффис, Централ тоуэр, Хүүхдийн ордны хойно байрлах үйлчилгээний 16 давхар барилга, Централ Моол зүүн дөрвөн замын урд талд 17 давхар орон сууц бүхий их дэлгүүр зэрэг барилга руу орсон бололтой юм.

Эдгээр оффис барилгууд нь 2017 онд эхэлж, 2019-2020 онуудад ээлж дараалан ашиглалтад орсон байдаг. Энэ үеэр буюу 2019 оны тавдугаар сард Капитал банк дампуурсан гэдгийг та бүхэн мэднэ. Тэгэхээр банкны хадгаламж эзэмшигчдийн мөнгө эдгээр оффис барилгуудад орсон байж таарна. Мөнхүү Хөгжлийн банкнаас аваад төлөөгүй мөнгө ч эдгээр офиссуудтай холбоотой.

Мөнхүү дээр дурдсан Монгол ном оффис, “Монгол эм импекс” концернийг өмч хувьчлалаар авсан төдийгүй Монголын 21 аймаг, 330 суманд өөрийн гэсэн обекът бүхийн улсын эмийн ууган үйлдвэрийг хувьчилж авсан юм.

Тэдний “Гантиг Вилла” Хөгжлийн банкны барьцаанд байгаа гэх боловч өөр хүний нэр дээр буюу “Эй Би Ти групп” компанид зарсан болгож, хөрөнгөө нуусан зэрэг асуудал байгаа ч ямар нэгэн арга хэмжээ авахгүй байна. Капитал банкны олон зуун хадгаламж эзэмшигчийн мөнгө, Хөгжлийн банкнаас авсан зээл, улсад хохируулсан учрал гээд асар их мөнгөний асуудал байгаа ч ямар нэг ял зэмгүй яваад байгааг юу гэж ойлгох вэ.