Монголын ширээний теннисний холбооны 17 дугаар чуулган өнгөрөгч амралтын өдөр амжилттай зохион байгуулагдлаа. Тус чуулганд 21 аймаг, есөн дүүрэг, нийт спорт клубуудээс ирвэл зохих 126 төлөөлөгчөөс 108 төлөөлөгч ирснээр 85 хувийн ирцтэй болж өнгөрсөн юм. Тус чуулганаар Ширээний теннисний холбооны ерөнхийлөгч Ц.Гантулга илтгэл тавьж, дотоодын болон олон улсын зэрэглэлийн тэмцээн уралдаанд оролцсон байдал, өнгөрөгч хугацааны санхүүгийн тайлан, үйл ажиллагааны талаар чуулганы төлөөлөгчдөд дэлгэрэнгүй мэдээлэл өгсөн. Энэ үеэр чуулганы төлөөлөгчид “Ерөнхийлөгч Ц.Гантулга өнгөрөгч найман жил холбоог удирдахдаа Азийн шилдэг зохион байгуулалттай холбоогоор шалгаруулж, “Бөртө чоно”-ын эзэн болгосон. Урьд өмнөх холбоодын бүтцээс илүү зохион байгуулалттай, илүү олон ажлыг нугалж, тамирчид, гишүүдээ нэгтгэж чадсан. Тамирчид маань тив, дэлхийн тэмцээнд олноор оролцож, ингэхдээ чамгүй амжилт гаргасан шилдэг зохион байгуулалттай холбоо байлгаж чадсан” гэдгийг дурдаж байлаа.

Өнгөрөгч хугацаанд тус холбоо нь өндөр зэрэглэлийн тамирчдыг бэлтгэж, Монгол Улсад тив, дэлхийн тэмцээнийг амжилттай зохион байгуулсан нь холбооны үйл ажиллагааг өндөрт өргөсөн явдал гэдгийг ч энэ үеэр онцолж байв. Чуулганы төгсгөлд холбооны дүрэмд өөрчлөлт оруулж, бүтэц зохион байгуулалтын өөрчлөлт хийснээр Ерөнхийлөгчөө сонгосон. Ширээний теннисний холбооны Ерөнхийлөгчийг сонгох сонгуульд Ц.Гантулга, О.Цогтбаатар нар нэрээ дэвшүүлж, О.Цогтбаатар нэрээ татснаар Ц.Гантулга улиран сонгогдлоо.

Ийнхүү гурав дахь удаагаа сонгогдож буй ерөнхийлөгч “Надад дахин итгэл хүлээлгэсэн та бүхэндээ баярлалаа. Манай холбоо бол идэвхтэй 20 гаруй мянган тоглогчтой, 10 гаруй мянган гишүүнчлэлтэй, спорт тоглоомуудын дунд топ зэрэглэлд орох томоохон холбоодын нэг. Цаашид холбооны үйл ажиллагааг шинэ түвшинд гаргаж, Монгол Улсын нэр хүндийг тив дэлхийд хүргэх зорилготой. Гадаад бодлогдоо тулгуурласан үйл ажиллагааг зохион байгуулах зорилготой байна” хэмээсэн юм.