Гамшгийн эрсдэлийг бууруулах үндэсний болон орон нутгийн зөвлөл байгуулагдан 6 жилийн хугацаанд үндэсний болон аймаг орон нутгийн хэмжээнд үйл ажиллагаагаа хэрэгжүүлэн ажиллаж байна.
Гамшгийн эрсдэлийг бууруулах асуудал нь зөвхөн онцгой байдлын байгууллагын үйл ажиллагаагаар хязгаарлагдахгүй тул тус зөвлөлд төрийн болон хувийн хэвшлийн байгууллага, иргэд олон нийт, судалгаа шинжилгээний байгууллага, хэвлэл олон нийт зэрэг олон салбарыг хамарсан төлөөллөөс бүрдэж эрсдэлийг бууруулахад хамтын хүчин чармайлт, зорилгын дор үйл ажиллагаа явуулж байгаа юм.
Аймаг, нийслэл, дүүргийн хэмжээнд гамшгийн эрсдэлийг бууруулах үйл ажиллагааг эрчимжүүлэх, гишүүдийн мэдлэг ойлголтыг нэмэгдүүлэх, олон улсын сайн туршлага, чиг хандлагаас суралцах зорилгоор Нэгдсэн Үндэстний Байгууллагын Гамшгийн эрсдэлийг бууруулах газрын Зүүн Хойд Азийн бүсийн төв, Дэлхийн боловсрол сургалтын төвөөс аймаг, нийслэл, дүүргийн гамшгийн эрсдэлийг бууруулах зөвлөлийн бүрэлдэхүүнд “Орон нутгийн түвшинд гамшгийн эрсдэлийн бууруулах үйл ажиллагаа ба эрт зарлан мэдээлэх систем” сэдэвт сургалтыг 2024 оны 12 дугаар сарын 03-05-ны өдрүүдэд БНСУ-ын Инчон хотноо зохион байгуулж байна.
Тус сургалтад гамшгийн эрсдэлийг бууруулах орон нутгийн зөвлөлийн нийт 38 хүн хамрагдаж байгаа бөгөөд сургалтад оролцогчид сургалтаас олж авсан мэдлэгээ өөрийн аймаг, орон нутгийн хэмжээнд гамшгийн эрсдэлийг бууруулахад үнэтэй хувь нэмэр оруулж, цаг үетэй зэрэгцэж бус, түрүүлж алхаж, сэтгэж, санаачилгатай ажиллах боломж нэмэгдэх юм.
