"Miss wоrld-2014" тэмцээний сүүлчийн шалгаруулалт өчигдөр боллоо. Лондон хотноо зохиогдсон уг тэмцээний сүүлийн шатны шалгаруулалт манай цагаар 22 цаг 20 минутаас эхэлсэн.
64 дэх удаагаа зохиогдож буй уг тэмцээнд энэ удаа 122 орны сайхан бүсгүйчүүд өрсөлдсөн юм. Монгол Улсыг төлөөлж Т.Батцэцэг оролцлоо. Оролцогчид финалын шалгаруулалтын өмнө спорт, авьяас гэсэн хэд хэдэн төрлүүдээр өрсөлдөж, тухайн төрөлдөө шилдгээ шалгаруулсан. Манай оролцогч спортын төрөлд 29, "Топ модель" төрөлд 20, дэмжигчдийн санал авсан байдлаар 21 дүгээр байрт тус тус шалгарсан юм.
Манай улсын хувьд "Дэлхийн мисс" тэмцээнд 2005 оноос оролцож эхэлсэн түүхтэй. 2005 онд Г.Хонгорзул, 2006 онд Э.Сэлэнгэ, 2007 онд Г.Оюунгэрэл, 2008 онд Ч.Анун, 2009 онд Б.Батцэцэг, 2010 онд А.Сарнай, 2011 онд Ө.Буянхишиг, 2012 онд Х.Баярмаа, 2013 онд С.Пагмадулам нар дэлхийн бусад орны гоо бүсгүйчүүдтэй өрсөлдөж байсан билээ. Эдгээр миссүүдээс А.Сарнай топ 25-д шалгарсан нь "Miss wоrld" тэмцээнд монгол бүсгүйчүүдийн үзүүлсэн хамгийн том амжилт болоод байсан. 2006 онд оролцсон Э.Сэлэнгэ топод багтаагүй ч авьяас болон спортын төрөлд тус бүр дөрөвдүгээр байрт шалгарсан нь бас нэг томоохон амжилт болоод байсан.
Т.Батцэцэг тэмцээний явцад явуулсан дэмжигчдийн санал асуулга, сэтгэгдлээр топ наймд багтаж, шигшээд нэлээд дээгүүр орж ирнэ гэсэн таамаг төрүүлээд байсан юм.
Бүтэн сарын турш үргэлжилсэн "Мьсс wорлд-2014" тэмцээний явцад Т.Батцэцэг биеэ авч явах байдал, хувийн соёлоороо шүүгчдээс нэлээд үнэлгээ авсан бол загвар өмсөгчийн мэргэжил талаараа гадны олон ажиглагчдын анхааралд өртсөн юм. Тэрээр тэмцээний явцад өөрийн цахим хуудсаар монголчууд, дэмжигчидтэйгээ холбоотой байж "Намайг үргэлж дэмжиж, урам зориг өгч буй та бүхэндээ баярлалаа. Би сүүлчийн шалгаруулалт хүртэл хичээх болно" хэмээж байсан. Азийн топ модель Т.Батцэцэг 23 настай. 178 см өндөртэй, 54 кг жинтэй. Биеийн харьцаа нь 88:63:90 гэсэн харьцаатай. Тэрээр "Манжуурын мисс", "Мисс Монголиа-2010" тэмцээнд амжилттай оролцоод буй манай шилдэг миссүүдийн нэг.
"Miss wоrld-2014" тэмцээний финалын шалгаруулалт Лондонгийн "Excel London" ордонд болсон бөгөөд Т.Батцэцэгийг дэмжихээр Монголоос олон арван үзэгчид, дэмжигчид Лондонг зорьсон юм. Финалын шалгаруулалтыг "UBS" телевиз шууд дамжуулав.
Манай улсын оролцогч Т.Батцэцэг Топ ангилалд 20 дугаар байр эзэлсэн ч шигшээд шалгарсангүй. Учир нь шигшээ 25-д ангилал тус бүрт эхний байруудад орсон миссүүд сонгогдсон юм. "Miss wоrld-2014"-ийн шилдэг 25 оролцогчоос топ аравт Энэтхэг, Өмнөд Африк, Англи, Гана, Бразил, Унгар, Кени, Америк, Мексик, Австралийн оролцогчид шалгарч, дээр нь олон нийтийн саналаар Тайландын мисс нэмэгдсэн. Тэднээс шилдэг тавд Унгар, Австрали, Өмнөд Африк, Америк, Английн оролцогчид тодорсон юм. Ингээд хүсэн хүлээсэн мөч ирж, шүүгчид оноогоо танилцуулаад "Miss wоrld-2014" тэмцээний ялагчаар Өмнөд Африкийн гоо бүсгүй шалгарсныг мэдэгдсэн. Удаах байрт Унгар, Америкийн миссүүд орсон юм. Ийнхүү дэлхийн гоо бүсгүй шалгаруулах тэмцээн Английн Лондон хотноо сарын турш үргэлжилж ялагчаа тодрууллаа.
Эх сурвалж: Dorgio.mn
