“Монгол Улсын Улаанбаатар хотын Дулааны гуравдугаар цахилгаан станцын өргөтгөл, шинэчлэлийн төслийн зураг төсөл боловсруулах тухай Монгол Улсын Засгийн газар, Оросын Холбооны Улсын Засгийн газар хоорондын хэлэлцээр”-ийг соёрхон батлах тухай хуулийн төслийг Эдийн засгийн байнгын хороо хэлэлцэж байна. Хуралдааны үеэр гишүүд асуулт асууж, хариул авч байна.

УИХ-ын гишүүн Ж.Алдаржавхлан:

-1.5 тэрбум еврогийн өртөгтэй төсөл юм байна шүү дээ. 85 хувийг нь ОХУ-аас зээлж байгаа юм байна. Зээлийн хэлэлцээг уншаад үзэхээр бүх тоног төхөөрөмж ОХУ-аас авна гэсэн байна. ОХУ-д энэ төрлийн орчин үеийн технологи байгаа юм уу. Аль 60 жилийн өмнө хийсэн машин нь одоо ч яг хэвээрээ л байна шүү дээ.

Эрчим хүчний сайд Б.Чойжилсүрэн:

-1.5 тэрбум биш 1 тэрбум 326 сая еврогоор барих санал ирүүлсэн. Бид буцаагаад ийм өндөр үнээр бариулж чадахгүй гэдэг саналыг ОХУ-д тавьж байгаа. Бидний хувьд 814 сая доллароос илүү өртгөөр бариулж чадахгүй гэсэн байр суурьтай байгаа. Тиймээс яг ажлын зураг төсвөө хийчхээд үнэ тохирохоор болсон. ОХУ-ын орчин үеийн тоног төхөөрөмжүүд бол байгаа юм байна лээ.