Төр, хувийн хэвшлийн хамтын ажиллагааг өргөжүүлэх зорилгоор Хан-Уул дүүргийн эдийн засаг, нийгмийн хөгжил цэцэглэлтэд бодитой хувь нэмэр оруулж буй аж ахуйн нэгж, байгууллагыг шалгаруулах, шалгарсан байгууллагын үйл ажиллагааг олон нийтэд мэдээлж, сурталчлах ажлын хүрээнд “ХҮҮХЭД, ГЭР БҮЛД ЭЭЛТЭЙ АЖ АХУЙН НЭГЖ, БАЙГУУЛЛАГА”-аар “МӨНХХАДА” ХХК, “ШИЛДЭГ ҮЙЛЧИЛГЭЭТЭЙ АЖ АХУЙН НЭГЖ, БАЙГУУЛЛАГА” -аар “ДИЖИТАЛ КОНЦЕПТ” ХХК-ийг тус тус шалгарууллаа.

“ХҮҮХЭД, ГЭР БҮЛД ЭЭЛТЭЙ АЖ АХУЙН НЭГЖ, БАЙГУУЛЛАГА”-аар шалгарсан “МӨНХХАДА” ХХК нь дараах үйл ажиллагааг зохион байгуулсан байна. Үүнд;

• “Хайр түгээх RAV4” төслийн хүрээнд Хан-Уул дүүргийн 41 дүгээр сургуулийн 1780 хүүхдийн номын санг иж бүрэн тохижуулсан,
• Хүүхдийн бүтээлч сэтгэлгээг дэмжих зорилгоор Хан-Уул дүүргийн 60 дугаар сургуулийн сурагчдад хог хаягдлын менежмент, хог хаягдлыг дахин боловсруулах мэдлэг олгох “Зуны Эко клуб” төслийг хэрэгжүүлж 300 хүүхдийг хамруулсан,
• Хан-Уул дүүргийн 7 дугаар сургуулийн багш, сурагчдын англи хэлний мэдлэгийг дээшлүүлэх сургалт зохион байгуулсан,
• Хан-Уул дүүргийн 26 дугаар сургуулийн сурагчдын дунд Өсвөрийн аврагч төсөл,
• Хан-Уул дүүргийн 10 дугаар сургуулийн сурагчдын дунд Өсвөрийн байгаль хамгаалагч төсөл,
• Хан-Уул дүүргийн 114 дүгээр сургуульд “Сургуулийн орчин дахь сэтгэл зүйн боловсролыг дэмжих” төсөл зэрэг өсвөр насны хүүхдийн хөгжил, төлөвшилд нөлөөлөх үр дүнтэй үйл ажиллагааг амжилттай хэрэгжүүлснийг үнэлж, ийнхүү Хан-Уул дүүргийн шилдэг аж ахуйн нэгж, байгууллагаар тодруулан “МӨНХХАДА” ХХК-ийн гүйцэтгэх захирал Чинбатын Батзоригийг “Хан-Уул Хангарди” медалиар шагналаа.

“ШИЛДЭГ ҮЙЛЧИЛГЭЭТЭЙ АЖ АХУЙН НЭГЖ, БАЙГУУЛЛАГА”-аар шалгарсан “ДИЖИТАЛ КОНЦЕПТ” ХХК буюу “GS-25” -ийн хамт олон улсын хэмжээнд 280 байршилд салбар сүлжээ дэлгүүрийг нээн ажиллуулж байгаа бөгөөд үүнээс 39 салбар сүлжээ дэлгүүр нь Хан-Уул дүүргийн нутаг дэвсгэрт үйл ажиллагаа явуулж байна. Тус байгууллага нь дараах үйл ажиллагааг зохион байгуулан ажилласан байна. Үүнд;

• “Ээлтэй хөрш нь байя” уриан дор үйл ажиллагаа явуулж, оршин суугч, үйлчлүүлэгчдэд тохилог орчин бүрдүүлэхээс гадна ая тухтай ариун цэврийн өрөөгөөр үйлчилгээ үзүүлдэг,
• “Байгаль орчиндоо Ээлтэй хөрш нь байя” уриан дор залуучуудын чөлөөт цагаа зөв боловсон өнгөрөөх орчныг засаж сайжруулах ажлыг тогтмол хийдэг,
• “Ногоон орчныг бий болгоё” уриан дор нийтийн эзэмшлийн гудамж талбайд мод, бут сөгийг тарьж ургуулсан,
• Хүссэн байршилдаа өөрийн боломжит цагийн хуваариар ажиллах хүний нөөцийн уян хатан бодлогыг хэрэгжүүлж хөгжлийн бэрхшээлтэй иргэн, ахмад настан, гэртээ хүүхдээ харж байгаа ээжүүд, хичээлийнхээ хажуугаар ажилладаг оюутнууд гэх мэт нийгмийн бүхий л давхаргын хүмүүсийг ажлын байраар хангадаг зэрэг нийгэмд эерэг өөрчлөлтийг бий болгох, иргэдэд зөв зан үйлийг төлөвшүүлэх үйл ажиллагааг амжилттай хэрэгжүүлснийг үнэлж, шилдэг үйл ажиллагаатай аж ахуйн нэгж, байгууллагаар тодруулан “ДИЖИТАЛ КОНЦЕПТ” ХХК-ийн гүйцэтгэх захирал Батсайханы Гантигийг “Хан-Уул Хангарди” медалиар шагналаа.