Өнгөрөгч УИХ-ын сонгуулийн өмнө өдгөөгийн УИХ-ын дарга, тухайн үеийн Засгийн газрын хэрэг эрхлэх газрын дарга Д.Амарбаясгалан Гаалийн албан татвараас чөлөөлөх тухай хууль өргөн барьж батлуулаад хагас жил гаруй нүүр үзэж байна. Уг нь УИХ, Засгийн газрын бодлого нь үндэсний үйлдвэрлэгчдээ дэмжинэ хэмээн лоозогнож байгаа ч гурил үйлдвэрлэгч, тариаланчдаа татан унагаасан хууль баталсан.

Харин Хүнс, хөдөө аж ахуй, хөнгөн үйлдвэрийн сайд Ж.Энхбаяр Гаалийн албан татвараас чөлөөлөх тухай хуулийг хүчингүй болсонд тооцох тухай хуулийн төслийг өргөн мэдүүлсэн. Үнэхээр л хөдөө аж ахуй, хүнсний салбар байгаа бол энэ эрүүл бус шийдвэрийг цуцалж, тариалан эрхлэгч, гурил үйлдвэрлэгчдээ дэмжихгүй бол цааш явах аргагүй.
Ж.Энхбаяр сайд Гаалийн албан татвараас чөлөөлөх тухай хуулийг хүчингүй болсонд тооцох тухай хуулийн төслийг өнгөрөгч баасан гаригт УИХ-ын дарга
Д.Амарбаясгаланд өргөн барьсан. Энэ бол алдаагаа бага дээр нь засаж байгаа маш зөв алхам. Тухайлбал, хуулийн хэрэгжилтийн хүрээнд гурилын импортын гаалийн албан татварыг чөлөөлсөнтэй холбоотой хилийн боомтуудаар орж ирж байгаа гурилын хэмжээ эрс нэмэгдэж жилийн эцсийн байдлаар нийт 64.2 мянган тонн улаанбуудайн гурил буюу Сэлэнгэ аймгийн Сүхбаатар боомтоор 35.9 мянган тонн, Баян-Өлгий аймгийн Цагааннуур боомтоор 14.1 мянган тонн, Увс аймгийн Боршоо боомтоор 10.3 мянган тонн, Сэлэнгэ аймгийн Алтанбулаг боомт, Завхан аймгийн Арцсуурь боомтоор 3.9 мянган тонн улаанбуудайн гурилыг Оросын Холбооны Улсаас тус тус импортолсон байна. УИХ, Засгийн газрын бодлого нь үндэсний үйлдвэрлэгчдээ дэмжинэ хэмээн лоозогнож байгаа ч гурил үйлдвэрлэгч, тариаланчдаа татан унагаасан хууль баталсан. Газар тариалангийн салбарыг сэргээхийн тулд Атрын аяныг зохион байгуулж, амжилт олсон. Тариалан эрхлэгчид, гурил үйлдвэрлэгчдийн бизнес сэргэж, дотоодын хэмжээнд өрсөлдөх чадвар нь өссөн үзүүлэлтэй олон аж ахуйн нэгжийг хөл дээр нь босгосон. Харин УИХ-ын дарга Д.Амарбаясгалангийн энэ хууль үндэсний үйлдвэрлэгчдээ татан унагаасан гэхэд болно. Харин Засгийн газар энэ алдаагаа эрт ухамсарлаж, хууль баталж байгаа нь сайн хэрэг гэдгийг тариалан эрхлэгч нар нэгэн дуугаар хэлж байна.

Tumen.mn