“New star” дуу бичлэгийн студиэс анх уран бүтээлийнхээ гарааг эхэлсэн дуучин ВХ буюу Б.Батбаатар богино хугацаанд “од” болж гялалзсан нууц нь продюссер П.Нармандахтай нь холбоотой гэж олон хүн үздэг. Тэгэхээс ч өөр аргагүй биз. Рок попын томоохон уран бүтээлчидтэй хамтран ажилладаг П.Нармандахыг ихэнх хүмүүс шударга нь дэндсэн адармаатай ааштай эмэгтэй гэлцдэг бөгөөд дуучин ВХ түүний хатуу гараар “хүмүүжсэн” нэгэн гэдэг нь ч үнэн.

Гэвч хэсэг хугацааны дараа тэрбээр урлагийн тайзнаа хөтлөн гаргасан эрхэм продюссерээ орхиж, бие даасан уран бүтээл хийхээр одох үедээ зарим нэгэн таагүй яриаг хэвлэлд өгсөн нь бий. Энэ бүхнээс түүнийг хөдөө орон нутгаар аялан тоглолтод оролцоод ирэхдээ өөрийн орлогоос багахан хэмжээний мөнгө дур мэдэн авсныг нь мэдсэн продюссер П.Нармандах алганы амт үзүүлсэн гэх мэдээлэл олны анхаарлыг ихээр татсан билээ.

Улмаар продюссертэйгээ таарамжгүй харьцан, “оддын өвчин”-өөр өвчилсөн дуучин ВХ-ийг П.Нармандахын том охин Г.Солонго алгадаж, студиэс нь хөөсөн тухай мэдээллийг тэрбээр нэгэнтээ үгүйсгэжээ. Үүгээр ч барахгүй, хэзээ ч продюссертээ алгадуулж байгаагүй хэмээн нэгэн нэвтрүүлэгт оролцохдоо мэлзсэн бөгөөд тухайн үед хамт явсан рок попын залуу уран бүтээлчид түүнийг ийнхүү жишим ч үгүй худал хэлсэнд нь ихэд гайхсан гэнэ лээ.