Ерөнхийлөгч У.Хүрэлсүхийн санаачилгаар дэлхийд зөвхөн Монголд байдаг Мазаалай баавгайг хамгаалах цогц ажлыг хоёр дахь жилдээ амжилттай зохион байгуулж байна. Их говийн дархан цаазат А хэсгийн бүсэд нутаглах Мазаалай баавгайн тоо толгой сүүлийн жилүүдэд өсөх хандлагатай байна. Мазаалай баавгай 2 дугаар сарын сүүл болон 3 дугаар сарын эхээр ичээнээсээ гарч ирдэг тул идэш тэжээл дутмаг энэ үед нэмэлт тэжээл тавьж өгдөг. Тиймээс Мазаалай баавгайг хамгаалах цогц ажлын хүрээнд энэ жилийн эхний нэмэлт тэжээлийг өнгөрөгч хоёрдугаар сарын 20-ноос эхлэн гуравдугаар сарын 20 хүртэл 26 цэгт байрлах 43 тэжээлийн саванд 3,440 килограмм нэмэлт тэжээл байршуулсан бол хоёр дахь удаагийн нэмэлт тэжээлийг тарааж байршуулах ажлыг энэ сарын 20-ноос эхлүүлсэн байна. Энэ удаад 4,000 килограмм нэмэлт тэжээл тарааж байршуулах бөгөөд хаврын улиралд нийт 7.5 тонн орчим нэмэлт тэжээлийг мазаалай баавгайн гол байршил нутагт тавьж өгөхөөр ажиллаж байгааг Ерөнхийлөгчийн Тамгын газрын Байгаль орчны төсөл, хөтөлбөр хариуцсан албаны дарга О.Алтансаруул онцоллоо. Уг ажилд Их говийн их дархан цаазат газрын А хэсгийн хамгаалалтын захиргааны мэргэжилтэн, байгаль хамгаалагч нар зүтгэл гарган идэвхтэй оролцдог байна.

Tumen.mn