Нөгөөдөр буюу энэ сарын 26-ны бямба гаригт Бөхийн өргөөнд Нийслэл МАН-ын ойд зориулсан хүчит 128 бөхийн барилдаан зарласан.

Тэгвэл энэхүү барилдаанд зодоглоно гэдгээ улсын хүчит арслан Хадбаатарын Мөнхбаатар сошиал хаягтаа бичиж, бөхийн хорхойтнуудыг хорхойг хүргэлээ. “2018 оноос хойш Бөхийн өргөөнд гараагүй юм байна. Нөгөөдөр нэг гаръя даа” гэж арслан бичжээ. Ингэснээр сүүлийн хоёр барилдаан дараалан ойрд өөр өөрийн гэсэн шалтгааны улмаас барилдаагүй хоёр арслан эргэн зодоглохоор боллоо.

Х.Мөнхбаатар арслангаас яагаад барилдахаар гэнэт шийдснийг нь лавлахад “Оюунболдыгоо өмнөх барилдаанд гарахыг хараад сэтгэл хөдлөөд Бөхийн өргөөнд гармаар санагдлаа. Нөгөөдрийн барилдаанд гарна аа. Одоо миний насныхны ид сайхан барилддаг цаг өнгөрсөн ч гэлээ. Ёс болгоод гарна” гэлээ.

Хүчит арслан маань Ховдынхонтой хоёр гурван удаа бэлтгэл хийсэн сурагтай. “Нөгөөдөр гарна аа. Хараарай” гээд инээмсэглэсэн юм.