УИХ-ын гишүүн С.Ганбаатарын зуслангийн байшинд АТГ-аас нэгжлэг хийсэн нь хаврын чуулган хаахаас өмнө юм.

Тухайн үед тэрбээр “Ерөнхийлөгч У.Хүрэлсүх энэ зүйлийг зохион байгууллаа, надад хууль зөрчсөн асуудал байхгүй” хэмээх байр суурийг илэрхийлээд байв.

Тэгвэл, С.Ганбаатарыг АТГ-аас шалгаж дуусаад гурван зүйл ангиар яллагдагчаар татах саналтай прокурорт хүргүүлжээ.

Зүйл анги нь,

• Эрүүгийн хуулийн 22.4 – Нийтийн албан тушаалтан хахууль авах
• Эрүүгийн хуулийн 18.6.2 - Мөнгө угаах
• Хуулиас хасагдсан 263.2 буюу шинэ хуулиарх үндэслэлгүй хөрөнгөжсөн заалтуудад тус тус үндэслэжээ.

Улмаар прокурор С.Ганбаатарт холбогдох энэ хэргийг шүүхэд шилжүүлэх эсэхийг хэлэлцэх хүлээлт үүслээ. Хэрэв шүүхээр шийдвэрлэвэл намрын чуулганы явцад түүнийг УИХ-ын гишүүнээс эгүүлэн татах нөхцөл үүснэ.

Одоогийн байдлаар УИХ-ын гишүүн Дав.Цогтбаатар тийм нөхцөлд байгаа ч гишүүн байх үедээ үйлдсэн гэмт хэрэг биш гэдгээр хөндөгдөхгүй явж байгаа.

С.Ганбаатарыг яг ямар асуудалд холбогдуулан шалгасан нь тодорхойгүй ч Монголын үйлдвэрчний эвлэлийн холбооны нэр дээрх газрыг хууль бусаар шилжүүлэн авч, борлуулсан гэх асуудал яригдсан юм.