Монгол Улсын Улсын их хурлын дарга Д.Амарбаясгалан МАН-ын даргын сонгуульд нэр дэвшиж оролцоно гэдгээ албан ёсоор зарлаад байгаа. Үүнтэй холбоотойгоор сүүлийн үед нийгмийн сүлжээгээр түүнийг экс ерөнхийлөгч Х.Баттулгатай холбоотой мэтээр мэдүүллүүд цацагдаад буй талаар цахим хуудсандаа дараах мэдэгдлийг нийтэлжээ.

Тэрбээр:

МАН-ын даргад өрсөлдөх мэдэгдэл зарим нэг хүнийг ихэд уурлуулав бололтой. Д.Амарбаясгаланг Женкотой холбох, нүүрсээр харлуулан будах төлбөрт даалгавартай сошиал армиуд өдөр шөнө, өглөө оройгүй гүтгэж, элдэв эвлүүлэг, зохиолоор дайрч байна!

Намайг холбож бичүүлж байгаа нөхөд эсрэгээрээ өөрсдөө түүнтэй хамтарч, юу юу хийж байсныг Монголын ард түмэн мартаагүй.

Харин бид энэ хүний эсрэг сөрөн зогсож, түүний хууль бус үйлдлүүдийг таслан зогсоож, намаа татан буулгах хэмжээний асуудлыг даван гарч байсныг журмын олон нөхөд минь мэдэх буй за.

МАН-ын асуудал бол Монголын зовлон биш. Улс төрийн намын асуудал!

Намын даргын асуудлыг нам дотроо ярьж болохгүй юу нөхөд өө?! Манай нам бас ч гэж дотроо өрсөлддөг, асуудлаа ярьж чаддаг нам байсныг сануулах илүүц биз.

Гаргасан шийдвэр, итгэл үнэмшил минь улам бүр асаж байна. Олон жил зүтгэсэн намынхаа ЕНБД-ын хариуцлагатай ажлыг хийж, шинэ үеийн дэвшилтэт үзэл баримтлал, арга барилтай нам болгохын төлөө зүтгэж ирснийхээ хувьд МАН маань уруудан доройтож байгааг хараад зүгээр суух эрх надад байхгүй. Би МАН-ын даргад өрсөлдөнө гэжээ.

Цахим сүлжээгээр доорх эвлүүлэг мэдээллүүдийг өргөн хэлбэрэээр түгээгээд байгаа юм.