Маргааш /2025.09.27/ МАН-ын бага хурал хуралдаж, намын даргаа сонгох сонгууль болно. Үүнтэй холбоотойгоор нам дотор хагарал гарч, нэр бүхий гишүүд ноцтой мэдэгдэл хийгээд байгаа билээ.

Өнөөдөр /2025.09.26/ гэхэд УИХ-ын гишүүн асан Ш.Раднаасэд хэвлэлийн бага хурал хийж, УИХ-ын дарга Д.Амарбаясгалангийн нүүрсний хулгай болон өрсөлдөгч нараа хэрэг тохон зайлуулдаг тухай мэдээлэл хийсэн. Харин өчигдөр /2025.09.25/ УИХ-ын дарга Д.Амарбаясгалан сэтгүүлчдийн асуултад нээлттэй хариулах байдлаар, Ерөнхийлөгч ба Ерөнхий сайдыг хагаралдуулсан гол хүн бол Г.Занданшатар хэмээсэн. Мөн өөртэй нь уулзаж, хос намын даргатай байя гэдэг санал ч тавьсан гэж мэдэгдсэн юм. Тэгвэл Монгол улсын Ерөнхий сайд Г.Занданшатар өөрийн цахим хуудастаа мэдэгдэл гаргажээ.

Тус мэдэгдэлд "Өнөөдөр Засгийн газрын 100 дахь өдөр. Хийх ажил, хуримтлагдсан асуудал ч их байна. Хамгийн сайн улс төр бол хийсэн ажил, шийдсэн асуудал, үр дүн гэдэг. Эдийн засгийн хүндрэл хямрал болж даамжрах аюулыг бид зогсоож, эдийн засгаа сэргээж чадлаа. Төмөртэйн овоо, Төгрөг нуурын ордуудаар Баялгийн санг арвижуулж эхэллээ. Урдах ажилдаа анхаараад удаа дараа мэдэгдэл хийх цаг ч, сонирхол ч байгаагүйг эрхэм журмын нөхөд маань ойлгоно гэдэгт итгэж байна. Худал, хулгай, хуйвалдааны замаар зорилгодоо хүрэх нь миний зарчим биш. Албан тушаалын төлөө журмын нөхдөө гүтгэж, хэлээгүйг хэлсэн мэт, хийгээгүйг хийсэн мэт ярьж, УИХ, Засгийн газар, нийгмээ, намаа талцуулж байгаа нь төрийн хүнд байх ёс зүй, мөн чанар огтхон ч биш ээ. Хийсэн ажилтай, хэлэх үгтэй очно. Нүүр нүүрээ харж, үнэн худлыг дэнсэлцгээе. Маргааш уулзъя" гэжээ.