Хотын дарга Х.Нямбаатарыг албан тушаалын бүрэн эрхээ хэрэгжүүлэх явцдаа ёс зүйн болон хууль зүйн зөрчил үүсгэсэн гэж үзэж uih.mn сайтад нийтийн өргөдөл үүсгэсэн. Одоогийн байдлаар 32 мянган хүн гарын үсэг зурсан ч албан бус сайт тул гарын үсэг хүчингүй, цаашид байнгын хороогоор хэлэлцэх боломжгүй юм байна.

Энэ талаар холбогдох албаны эх сурвалжаас тодруулахад "UIH.MN бол "Цогц хөгжлийн үндэсний төв" нэртэй нийтийн үйлчилгээний төрийн бус байгууллагын санаачлан ажиллуулдаг цахим сайт юм. Иймд тус сайтад байршуулсан өргөдөл, санал нь УИХ-д хандсан албан ёсны өргөдөлд тооцогдохгүй бөгөөд олон нийтийн санаачилга, хэлэлцүүлгийн шинжтэй байна.

Харин нийтийн өргөдлийг албан ёсоор "petition.parliament.mn" цахим сайтаар хүлээн авдаг. Тус системд ирүүлсэн өргөдлийг УИХ-ын тухай хуулийн 39 дүгээр зүйлд заасан шаардлагыг хангасан эсэхийг хянан шалгасны үндсэн дээр нийтэлнэ. Шаардлага хангасан өргөдлийг petition.parliament.mn цахим системд 30 хоногийн хугацаатай байршуулах ба уг өргөдлийг дэмжсэн санал хуульд заасан тоонд хүрсэн тохиолдолд УИХ авч хэлэлцэхээр заасан байдаг" хэмээсэн юм.

Нийтийн өргөдөл хүлээн авах цахим системд байршуулсан саналыг 100.000 ба түүнээс дээш тооны иргэн дэмжсэн бол УИХ-ын дарга уг асуудлын талаар УИХ-ын чуулганд мэдээлж, холбогдох Байнгын хороонд шилжүүлнэ хэмээн УИХ-ын чуулганы хуралдааны дэгийн тухай хуулийн дагуу Инновац, цахим бодлогын байнгын хорооны 2023 оны 01 дүгээр тогтоолоор баталсан журамд заасан байдаг билээ.