Семинарыг ALPA-Mongolia-ийн тэргүүн Л.Баяржаргал нээж үг хэлсэн бөгөөд Иргэний нисэхийн ерөнхий газрын дарга Т.Төрбаяр, Иргэний нисэхийн хамтын ажиллагааны хэлтсийн дарга, Байнгын хяналтын үндэсний зохицуулагч (NCMC) Г.Батбаяр нар оролцож, мэндчилгээ дэвшүүлэн үг хэлэв. Тэд иргэний нисэхийн аюулгүй байдлыг цаашид бэхжүүлэхэд салбарын төрийн мэргэжилийн хяналтын байгууллага, агаарын тээвэрлэгчид болон нисгэгчдийн мэргэжлийн холбооны нягт хамтын ажиллагаа чухал болохыг онцоллоо.
Семинарын хүрээнд Дэлхийн Нисгэгчдийн Холбоо (IFALPA)-ны Ази, Номхон далайн бүсийн дэд ерөнхийлөгч Captain Jaffar Hassan "Positive Culture, Just Culture & SMS" болон "Just Culture — сургалт, суралцах, буруутгалаас зайлсхийх соёл" сэдвээр илтгэл тавив. Мөн IFALPA-ны Ази, Номхон далайн хойд бүсийн дэд ерөнхийлөгч Captain Lee ChoongSub "Иргэний нисэхийн зохицуулах байгууллагуудын нисгэгчдийн сэтгэл зүйн эрүүл мэндийн удирдлагын тогтолцооны хязгаарлалт ба сайжруулах чиглэлүүд" сэдвээр илтгэл танилцууллаа. Илтгэлүүдийн явцад оролцогчдын идэвхтэй оролцоо, хэлэлцүүлэг өрнөж, цаашдын хамтын ажиллагааны талаар олон санал, санаачилга дэвшүүлэв.
Хурлын онцлох сэдвүүдийн нэг нь ИНЕГ-аас танилцуулсан "Монголын нисгэгч, байцаагчдын чадамжийг бэхжүүлэх" Харилцан ойлголцлын санамж бичиг (MOU) байлаа. Уг санамж бичгийн зорилго нь Монгол Улсын хэмжээнд ИНЕГ-ын хяналт, зохицуулалтын чиг үүргийг дэмжих чадамжтай нисгэгчдийн нөөцийг агаарын хөлгийн маяг тус бүрээр бүрдүүлэх, иргэний нисэхийн салбарын хүний нөөцийн тогтвортой байдлыг хангах төрийн бодлогыг хэрэгжүүлэх, мөн ИНЕГ, агаарын тээвэрлэгчид болон Монголын Иргэний Агаарын Тээврийн Нисгэгчдийн Холбоо (ALPA-Mongolia)-ны хамтын ажиллагааг өргөжүүлэн хүний нөөцийг хөгжүүлэхэд чиглэж байна.
Санамж бичгийг хэрэгжүүлэхэд шаардлагатай дараагийн алхмуудыг талууд хамтран тодорхойлж, хэрэгжилтийг үе шаттайгаар ханган ажиллахаар санал нэгдэв.
Семинарын төгсгөлд оролцогчид иргэний нисэхийн аюулгүй байдлыг тасралтгүй сайжруулах, Just Culture-ийн зарчмыг байгууллагын соёлд төлөвшүүлэх, салбарын хамтын ажиллагааг улам бэхжүүлэх чиглэлээр цаашид нягт хамтран ажиллахаа илэрхийллээ.
