Төрийн одон медаль хүртсэн хүмүүст хандан Монгол Улсын Ерөнхийлөгч Ц.Элбэгдорж баяр хүргэж үг хэллээ. Тэрбээр “Монгол Улс тусгаар тогтнолоо сэргээн мандуулсны 103 жилийн ой тохиож буй энэ өдрүүдэд Монгол Улсын тусгаар тогтнол бүрэн эрхт байдлын илэрхийлэл, есөн хөлт их цагаан сүлд орших хүндэт их өргөөнд ажил амьдралаараа хамт олноо манлайлж, хөдөлмөр зүтгэлээрээ шалгарсан хүмүүст төрийн дээд цол, одон медаль гардууллаа.
Эдгээр өдрүүдэд Монголын ард түмэн орчин цагт сэтгэн бодох, эрх чөлөөтэй бүтээн туурвих, хувь заяандаа эзэн болох, эвлэлдэн нэгдэх эрхээ олж жинхэнэ эрх чөлөөний үнэ цэнийг мэдэрсэн түүхэн боломжийн 25 жилийн ойг онцлууштай. Эх орныхоо хөгжилд дэвшилд эрх чөлөөний эхэн үйл хэрэгт зүтгэж яваа Монголын мянга, мянган хөдөлмөрч иргэдийнхээ төлөөлөлд хүндэтгэлд үзүүлсэндээ баяртай байна.
Энэ танхимд манай орны бүтээн байгуулалт үйлдвэрлэл үйлчилгээний салбарын тэргүүлэх зүтгэлтнүүдийн төлөөлөл, мянган, мянган шавь төрүүлсэн эрдмийн уурхайн эзэн багш, энхийн манаанд олон жил зогссон эмчээс эхлээд сэтгүүлч, шатарчин, зохион бүтээгч дасгалжуулагч, жолооч, яруу найрагч, зурагчин, зураач малчин гээд салбар, салбартаа манлайлал үзүүлж яваа иргэдийнхээ, зүтгэл сэтгэлийг Монголын төр үнэллээ.
БНМАУ-ын сайд нарын зөвлөлийн сангийн аж ахуй удирдах Ерөнхий газрын даргын албыг хашиж байгаад Өвөрхангай аймгийн Сант сумын “Хөгжил” нэгдлийн туслах малчнаар ажиллах болж амьдралын бартаа нугачаа, бэрхшээл сорилтыг туулан хүний эрх эрх чөлөөний үнэ цэнийг бие сэтгэлээрээ мэдэрч явсан 20 дугаар зууны Монголын төрийн алдаа, онооны бодит гэрч төр нийгмийн нэрт зүтгэлтэн Цогт-Очирын Лоохууз гуай Монгол улсын гавьяат хэмээх эрхэм цолыг хүртлээ. Алаг дэлхийд мэндэлсэн олон шинэ хүнийг өлгийдөн авсан алтан гартай ачтан улсын клиникийн нэгдүгээр төрөхийн эх баригч эмч Банзрагчийн Оюунгэрэл гуай Монгол Улсын хүний гавьяат эмч гэдэг сайхан цолыг хүртлээ.
Ардчилсан хөдөлгөөний сүлд дуу “Хонхны дууг” хөгжимдөж дуулсан “Хонх” хамтлагийн дуучин Намсрайжавын Энхбаяр Соёлын гавьяат зүтгэлтэн цол хүртлээ. Хятад хэлний орчуулагч Монцамэ агентлагт олон жил ажилласан редактор Цэрэнгийн Сүрэнжав гуай Монгол Улсын Соёлын гавьяат цол хүртлээ.
Мөн эх орныхоо нэрийг даян дэлхийд цуурайтуулж яваа Жүдо бөхийн Дэлхийн аварга, ОУХМ Ганбатын Болдбаатар, Чөлөөт бөхийн Дэлхийн аварга, ОУХМ Сүхээгийн Цэрэнчимэд, Чөлөөт бөхийн дэлхийн аварга тэмцээний хүрэл медальт ОУХМ Энхсайханы Ням-Очир, Шатарын оюутны дэлхийн аварга ОУ-ын шатарын их мастер Батхуягийн Мөнгөнтуул нар Монгол Улсын гавьяат тамирчин цол хүртсэнд баяр хүргье. Шударга хөдөлмөрийн үнэ цэнэ ямагт сайн, сайхан амжилт авчирдаг. Олон мянган иргэдийн сайн, сайхан амжилтаас улс орны өнгөлөн дэвжих эх сурвалж авдаг ” гэсэн юм.
